കുത്തിവര

കൊച്ചിയിലെ ചിത്രപ്രദര്‍ശനം ആരംഭിച്ചു.

2011-12-26T20:13:00.000+05:30

കൊച്ചിയിലെ ബിന്ദി ആര്‍ട്ട് ഗാലറിയില്‍ ശ്യാം ലാല്‍ ഐവര്‍ കാലയുടെയും റ്റി ആര്‍ രാജേഷിന്റെയും ചിത്രങ്ങളുടെ പ്രദര്‍ശനം ഡിസംബര്‍ 26ന് ആരംഭിച്ചൂ. പ്രദര്‍ശനം ഡിസംബര്‍ 30 (വെള്ളിയാഴ്ച) വരെ തുടരും. സമയം രാവിലെ 10 മുതല്‍ വൈകുന്നേരം ഏഴു വരെ.

ലളിത കലാ അക്കാദമി വൈസ് ചെയര്‍മാന്‍ പ്രൊഫസര്‍ കാട്ടൂര്‍ നാരായണ പിള്ള പ്രദര്‍ശനം ഉദ്ഘാടനം ചെയ്യുന്നു

ചിത്രപ്രദര്‍ശനം കാണാനെത്തിയവര്‍

കൊച്ചിയില്‍ ഞങ്ങളുടെ ചിത്രപ്രദര്‍ശനം

2011-12-26T09:36:00.000+05:30

ശ്യാം ലാല്‍ ഐവര്‍കാല എന്ന എന്റെ സുഹൃത്തും റ്റി ആര്‍ രാജേഷ് എന്ന ഞാനും ചേര്‍ന്ന് കൊച്ചിയിലെ ബിന്ദി ആര്‍ട്ട് ഗ്യാലറിയില്‍ വച്ചു സംഘടിപ്പിക്കുന്ന അക്രിലിക് പെയിന്റിങ്ങുകളുടെ പ്രദര്‍ശനോദ്ഘാടനം ഇന്ന് രാവിലെ പതിനൊന്നുമണിക്ക് ലളിതകലാ അക്കാദമി വൈസ് ചെയര്‍മാന്‍ പ്രൊഫസര്‍ കാട്ടൂര്‍ നാരായണ പിള്ള നിര്‍വഹിക്കുന്നു. താങ്കളെ ഹാര്‍ദ്ദമായി സ്വാഗതം ചെയ്തുകൊള്ളുന്നു.

പ്രദര്‍ശനത്തിനെക്കുറിച്ചുള്ള ബ്രോഷറിന്റെ ഒരു വശം

ബ്രോഷറിന്റെ ഉള്‍വശം

പഴമരുത്!

2011-10-09T13:27:00.003+05:30

“പകലരുത്
പലരരുത്
പഴമരുത്”
.
...മദ്യപാനത്തിന്റെ ശരികളെയും തെറ്റുകളെയും പറ്റി
സംസാരിക്കവേ ജോസുകുട്ടി സാര്‍ ഉദ്ദരിച്ച വരികളാണ് മുകളില്‍.
ഇനി കഥ.
.
ഏകാന്തവാസത്തിനൊടുവില്‍ നാട്ടില്‍ ചെല്ലുമ്പോള്‍
ഉടുപ്പഴിക്കുമ്പോല്‍ ഭാര്യയെ അന്തം വിടീപ്പിക്കാനായി
ഒരു സിക്സ് പാക് വയറുണ്ടായാല്‍ എങ്ങനെയിരിക്കും?
640 രൂപ കൊടുത്ത് 20 പൌണ്ടിന്റെ രണ്ട് ഡംബെല്‍‌സ് വാങ്ങുവാന്‍
എന്നെ പ്രേരിപ്പിച്ചത് ഈ ചിന്തയായിരുന്നു. (ഡംബെല്‍‌സ് എടുത്തുയര്‍ത്തിയാല്‍
വയറു കുറയുമോ എന്നത് വേറേ കാര്യം.)
സ്വന്തമായുള്ള കുക്കിങ് തുടങ്ങിയപ്പോഴേ കുടവയര്‍ തോല്‍‌വി സമ്മതിച്ചിരുന്നു.
പിന്നെ രാവിലെയും വൈകിട്ടുമുള്ള നടത്തവും വെയിലും തുണികഴുകലും
ഒക്കെക്കൂടിയായപ്പോ ഇനി വലിയ കായികാഭ്യാസമൊന്നുമില്ലെങ്കിലും
ഒന്നു മെലിയാമെന്നായപ്പോഴാണ് ഈ സാഹസം.

കൃഷ്ണാഷ്ടമിയുടെ അവധിദിവസം വേറേ പണിയൊന്നുമില്ലാതെ നടക്കുമ്പോഴാണ്
കടയില്‍ തൂക്കിയിട്ടിരിക്കുന്ന പാളയം തോടന്‍ പഴം കണ്ടത്.
പഴം കഴിച്ചിട്ട് കുറേ നാളായല്ലോ എന്നു വിചാരിച്ച് പത്തുരൂപയ്ക്ക്
പഴവുമായി വേഗം മുറിയിലെത്തി. പഴം രണ്ടെണ്ണം ഉടന്‍ തന്നെ അകത്താക്കി.
സമയം 5.30
എക്സര്‍സൈസ് റ്റൈം!
വളരെ പ്രയാസപ്പെട്ട് രണ്ട് ഡം ബെല്‍‌സും എടുത്തുയര്‍ത്തി.
ടി വി യിലും സിനിമയിലും ഒക്കെ കണ്ടിട്ടുള്ള കസര്‍ത്തുകളില്‍ ചിലത്
അനുകരിച്ചു നോക്കി. നല്ല കടുപ്പം.
അതു കഴിഞ്ഞ് രണ്ടുമൂന്നു പുഷ് അപ്പു കൂടിയായപ്പോഴേക്കും എന്തോ ഒരു വല്ലായ്മ.
ഓക്സിജന്‍ കുറഞ്ഞ പോലെ.
കോപ്രായങ്ങള്‍ മറ്റാരും കാണെണ്ട എന്നു കരുതി അടച്ചിട്ടിരുന്ന ജന്നല്‍‌പാളികള്‍
തുറന്നിട്ടു നോക്കി. രക്ഷയില്ല.
മട്ടുപ്പാവില്‍ പോയി ചില ശ്വസനക്രിയകള്‍ ചെയ്യാമെന്നു കരുതിയപ്പോ
ചാറ്റമഴ. വെപ്രാളം നില്‍ക്കാനായി പെട്ടെന്നു തോന്നിയത് തലവഴി കുറച്ചു വെള്ളം
ഒഴിക്കാനാണ്. കുളികഴിഞ്ഞപ്പോ ദാ വരുന്നു ഏമ്പക്കത്തിന്റെ ഒരു പരമ്പര.
അപ്പോ ദദാണ് കാര്യം. ഗ്യാസ്.
കുറേ നാളായി ഈ സാധനത്തിന്റെ ശല്യമില്ലായിരുന്നു.
പഴമാണ് പറ്റിച്ചത്.

ഫയര്‍സ്റ്റേഷനടുത്തുള്ള കടമുറികളിലൊന്നില്‍ ചെറിയ കപ്പില്‍ തൈരുകിട്ടും.
അങ്ങോട്ടു നടന്നു തൈരും വാങ്ങിമടങ്ങുമ്പോള്‍ ഇതില്‍
പച്ചമുളക്, കറിവേപ്പില, ഉള്ളി, ഇഞ്ചി, ഉപ്പ് എന്നിവയിട്ട് വെള്ളമൊഴിച്ച്
ഒരു ഗ്ലാസ് മൊന്തുന്നതിനേപ്പറ്റി ഓര്‍ത്തതേയുള്ളൂ. പാതി രോഗം മാറി.

പട്നായിക് ഹോട്ടലില്‍ ചപ്പാത്തിയുണ്ടാക്കുന്നു.
എന്നും രാത്രി ഉണക്കറോട്ടിയാണ് ഭക്ഷണം.
ഇതാണെങ്കില്‍ നെയ്യില്‍ മൊരിച്ചത്.
ചോറും സ്വാദില്ലാത്ത സാമ്പാറും ഹൌസ് ഓണര്‍ ദാനം തന്ന
മസാല കൂടിയ വെണ്ടയ്ക്കാക്കറിയും വീട്ടിലിരുപ്പുണ്ട്.
ചെന്നിട്ട് എല്ലാം കൂടി എടുത്ത് തൊട്ടില്‍ കളയണമെന്ന് കരുതിയതായിരുന്നു.
തൈര് എല്ലാം മാറ്റി മറിച്ചിരിക്കുന്നു.
മുറിയിലെത്തി.
കറിവേപ്പിലയെടുത്തു.
പച്ചമുളകരിഞ്ഞു.
ഉള്ളിയരിഞ്ഞു.
ഇഞ്ചി കൊത്തിയരിഞ്ഞു.
തൈരില്‍ ഇവയെല്ലാമിട്ട് നന്നായി മിക്സ് ചെയ്തു.
ചോറില്‍ ഗ്രീന്‍ പീസും കാരറ്റ് കഷ്ണങ്ങളും ഇട്ടിട്ടുണ്ടായിരുന്നു.
(സഫ്രോണ്‍, വെള്ള, പച്ച..ഇപ്പോഴും ഇന്‍ഡിപ്പെന്റന്‍സ് ഡേയുടെ ഹാങ്ങോവറിലാണ്).
അപ്പോഴാണ് മോരും വെള്ളം എന്ന പ്ലാന്‍ മാറ്റിയിട്ട്
തൈരുസാദം എന്ന ആശയത്തിലേക്കു വന്നത്. (ശരിക്കുള്ള
തൈരുസാദം കഴിച്ചിട്ടുള്ള തമിഴന്മാരും മലയാളികളും എന്നോടു ക്ഷമിക്കുക).
ചോറും തൈരും കൂടി നന്നായി മിക്സ് ചെയ്തു.
ചെയിന്‍ റിയാക്ഷന്‍ എന്നൊക്കെ പറയുമ്പോലെ എനിക്ക് അടുത്ത
മിക്സിങ്ങിനുള്ള ഐഡിയ വന്നു.
വീട്ടുടമസ്ഥയുടെ മസാലയില്‍ വേവിച്ച വെണ്ടയ്ക്കക്കഷ്ണങ്ങള്‍ എടുത്ത്
എന്റെ നിര്‍ജ്ജീവമായ സാമ്പാറിലേക്കിട്ടപ്പോള്‍ - പെര്‍ഫക്ട് ബ്ലെന്‍ഡ്.
ഈ ബുദ്ധി നേരത്തേ തോന്നാത്തതില്‍ എനിക്ക് ലജ്ജ തോന്നി.
രണ്ടുരുള കഴിച്ചപ്പോഴേക്കും വീണ്ടും പുതിയ ആശയം ഉണര്‍ന്നു.
ഈ തൈരുസാദം മിക്സും സാമ്പാര്‍ മിക്സും കൂടി ഒന്നുകൂടി മിക്സ് ചെയ്താലോ?
പശുവിനു കൊടുക്കുന്ന കാടി പോലത്ത ഒരു സംഭവമായിരുന്നു ഉല്‍പ്പന്നം.
ചപ്പാത്തി മുറിച്ച് ഈ ഘോരദ്രാവക മിശ്രിതത്തിലിട്ട് എല്ലാം കൂടി
വാരിവലിച്ചകത്താ‍ക്കിയതോടെ സകല സൂക്കേടും പമ്പകടന്നു.
നമ്മക്കിതൊക്കേ പറ്റൂ.

ഗുണപാഠം:

(1‌) ഭാര്യയെ കാണിക്കാന്‍ മസിലുണ്ടാക്കരുത്.
(2) പാളയന്‍ തോടന്‍ പഴം കഴിച്ചിട്ട് ഡം ബെല്‍‌സ് പൊക്കരുത്.
(3)മൈ സോറി തൈര് ഗ്യാസിനെ ശമിപ്പിക്കുകയും ബുദ്ധിയെ ഉണര്‍ത്തുകയും ചെയ്യും..

പിന്നെ,
ആദ്യം എഴുതിയ ജോസുകുട്ടിസാറിന്റെ ഉദ്ധരണി മദ്യത്തെക്കുറിച്ചാണോ
അതോ മറ്റു വല്ലതിനേയും കുറിച്ചാണോ എന്ന് എനിക്കിപ്പോഴും സംശയമുണ്ട്.
.

പാദപട്ടണം

2011-10-06T18:40:00.000+05:30

പടിഞ്ഞാറെ മലനിരകള്‍

മലമുകളിലെ അമ്പലമുറ്റത്തുനിന്നുള്ള ദൃശ്യം

ഒറീസ്സയിലെ പര്‍ലക്കമണ്ടിയില്‍ നിന്നും ആന്ധ്രാപ്രദേശിലെ പാദപട്ടണത്തിലേക്കാണ് യാത്ര.
ദൂരം 3 കിലോ മീറ്റര്‍!
റോഡു നിറയെ പശുക്കള്‍.
ഓട്ടോറിക്ഷയ്ക്കുള്ളില്‍ ഉച്ചത്തില്‍ വച്ച തെലുങ്കു സംഗീതം.
നൂറുകണക്കിന് പശുക്കളുടെ ഇടയിലൂടെ വണ്ടി കുലുങ്ങി കുലുങ്ങി നീങ്ങുമ്പോള്‍
പശുക്കളുടെ കുലുങ്ങുന്ന പിന്‍ഭാഗങ്ങള്‍ക്കു പശ്ചാത്തലമായി കോളിവുഡ് താളമേളം.
ക്യാമറ കയ്യിലുണ്ടായിരുന്നെങ്കില്‍ ശരിക്കും ചിരിപ്പിക്കുന്ന ഒരു വീഡിയോ ക്ലിപ് കിട്ടിയേനേ.
ഡ്രൈവറുടെ സീറ്റില്‍ കൂടെയിരിക്കുന്ന പയ്യന്‍ പശുക്കളെ തൊട്ടു തലോടിയാണ് യാത്ര.
ഞാന്‍ കയറിയതോടെ പിന്‍ സീറ്റില്‍ അകന്നിരുന്ന ഒരു വൃദ്ധനും വൃദ്ധയും അപ്പോഴേക്കും
അടുത്തിരുന്നു.
ഇവിടെയൊക്കെ ഏത് ഓട്ടോറിക്ഷാക്കാരനോടു എന്തു ചോദിച്ചാലും ഉടനടി ഒരു റെഡിമേഡ്
ഉത്തരമുണ്ട്. ‘തര്‍ട്ടി റുപ്പീസ്’.
സായി മന്ദിറിലേക്കു പോകണ്ട. എന്നെ വഴിയില്‍ വിട്ടാല്‍ മതി. ഞാന്‍ പറഞ്ഞു.
പങ്കിട്ടുള്ള യാത്രയാണ്. ആളൊന്നിന് അഞ്ചുരൂപ.

മലമുകളില്‍ പ്രൌഡിയോടെ ക്ഷേത്രം.
ഷിര്‍ദ്ദിസായിയുടെ അമ്പലമാണ്.
ഇരുവശവും വീടുകള്‍ നിറഞ്ഞ ഒരു തെരുവിലൂടെ ഞാനൊരു കുറുക്കുവഴി കണ്ടെത്തി.
പിന്നെ പണ്ട് ടിക്കറ്റെടുക്കാതെ ക്രിക്കറ്റു കാണാനായി യൂണിവേഴ്സിറ്റി സ്റ്റേഡിയത്തിലെ കമ്പിവേലിക്കിടയിലൂടെ ഊര്‍ന്നു കയറിയപോലെ കുറ്റിക്കാട്ടിലൂടെ കുന്നുകയറി മറ്റൊരു ഷോര്‍ട്ട് കട്ട്. അമ്പലത്തിന്റെ പിന്‍ മുറ്റത്തേക്ക്.
നിര്‍മാല്യം സിനിമയിലെ കടവും അമ്പലവും ശാന്തിക്കാരന്‍ ബാബു നമ്പൂതിരിയുടെ വരവും മനസ്സില്‍ മിന്നിമറഞ്ഞു. ആകാശം നിറയെ കാറ്.
പടിഞ്ഞാറായി വയലറ്റിന്റെയും നീലയുടെയും പലതരം ഷെയ്ഡുകളിലായി ചെറുതും വലുതുമായി മലനിരകള്‍,
ആകാശം, കസവു വലിച്ച പോലെ വെള്ളിമേഘം. അങ്ങു താഴെ ചെറു ചെറു വീടുകള്‍. ഉറുമ്പു മനുഷ്യര്‍.
തെക്കും കിഴക്കും വടക്കുമായി പച്ച നിറഞ്ഞ വന്മലകള്‍. ഇളം കാറ്റ്. ഏകാന്തത.
ഒരു കൊറ്റി മേഘങ്ങള്‍ക്കു മീതേ പറന്നു പോകുന്നു. ശ്രീരാമകൃഷ്ണ പരമഹംസരെ ഓര്‍ത്തു.
കുട്ടിക്കാലത്ത് മഴമേഘങ്ങള്‍ മൂടിയ ആകാശത്ത് ഒരുകൂട്ടം കൊറ്റികള്‍ പറക്കുന്നതു കണ്ട് അദ്ദേഹം

മോഹാലസ്യനായി വീണു പോയിരുന്നു.
അമ്പലത്തിനുള്ളില്‍ ആരുമുണ്ടായിരുന്നില്ല.
വാതില്‍ക്കല്‍ വര്‍ത്തമാനം പറഞ്ഞു നിന്നിരുന്ന രണ്ടു പേര്‍ ഉള്ളിലേക്കു വന്ന്
എനിക്ക് തീര്‍ത്ഥവും ഭസ്മവും തന്നു. ഭണ്ഡാരത്തില്‍ നാണയത്തുട്ടുകള്‍ നിക്ഷേപിച്ചിട്ട്
ചുവരില്‍ പതിപ്പിച്ച കണ്ണാടിയില്‍ നെറ്റിയിലെ കുറിയുടെ ഭംഗി നോക്കി.
മൈസൂര്‍ പാക്കിന്റ് ഒരു കഷ്ണമായിരുന്നു പ്രസാദം.
ക്ഷേത്രത്തിനു വലതുവച്ച് മലയിറങ്ങുമ്പോള്‍
തീര്‍ത്ഥവും ഭസ്മവും തന്ന ചെറുപ്പക്കാരന്‍ കൂടെക്കൂടി.
വീട്ടില്‍ വഴക്കിട്ടിറങ്ങിയതാണത്രേ.
എങ്ങോട്ടു പോകണമെന്നറിയില്ല!
ഭഗവാനോടു ചോ‍ദിക്കാനിറങ്ങിയതാണ്.
മഴപെയ്തു തുടങ്ങി.
പോക്കറ്റില്‍ നിന്നും പോപ്പി നാനോ പുറത്തെടുത്തു നിവര്‍ത്തി.
ചെറുപ്പക്കാരനെ കുടക്കീഴിലേക്കു കൂട്ടി.
റോഡെത്തിയപ്പോള്‍ വണ്ടിക്കൂലിക്കുള്ള കാശു കൊടുക്കാന്‍ തുറങ്ങിയെങ്കിലും
അയാള്‍ വാങ്ങിച്ചില്ല.

മഴ മാറി.
ചന്ത.
ചെറിയ ചെറിയ ഒരുപാട് കുടകള്‍.
ഒരു തുണിക്കട.
കോട്ടണ്‍ സാരികള്‍ അടുക്കിവച്ചിരിക്കുന്നു.
കൈത്തറിയാണ്.
ആന്ധ്രയിലെ ശ്രീകാകുളം എന്ന സ്ഥലത്ത് നിര്‍മ്മിച്ചവയാണ്.
ഒറ്റനിറം. രണ്ടറ്റത്തും വള്ളിനിറത്തില്‍ പട്ടില്‍ നെയ്ത വര.
ഇത്രയേ ഉള്ളൂ.
കരിനീല, ഇരുണ്ട കാപ്പിപ്പൊടി, വയലറ്റിന്റെ ഏറ്റവും ഡാര്‍ക് ഷെയ്ഡ്.
ഇവയില്‍ ഏതെടുക്കണം എന്നു കരുതി നില്‍ക്കുമ്പോള്‍ ഭാര്യയുടെ
അതേ നിറമുള്ള ഒരു യുവതിയും ഭര്‍ത്താവും കടയിലെത്തി.
അമ്മാ, ഇതില്‍ ഏതെടുക്കണം? ഞാന്‍ ചോദിച്ചു.
പെണ്ണീനു നാണമായി.
കടക്കാരന്‍ തെലുങ്കിലെക്കു മൊഴിമാറ്റിയപ്പോള്‍ അവര്‍ പറഞ്ഞു:
രണ്ടും കൊള്ളത്തില്ല. ലൈറ്റ് കളര്‍ വല്ലതുമെടുക്ക്.
അങ്ങനെ ഞാന്‍ മജന്ത നിറത്തിലുള്ള ഒരു സാരിയും ചേരുന്ന
ബ്ലൌസ് പീസു മായി പുറത്തിറങ്ങി. പത്തുമീറ്റര്‍ നടപ്പിനിടയില്‍
പത്തു തവണയെങ്കിലും കവര്‍ തുറന്ന് ഇതെന്തൊരു കളര്‍ എന്ന്
വീണ്ടും വീണ്ടും നോക്കി.
കീശ കാലിയായിരുന്നു.
എ.ടി.എം. അന്വേഷിച്ച് കണ്ടെത്തി.
കാശെടുത്ത് പുറത്തിറങ്ങിയപ്പോഴേക്കും കോരിച്ചൊരിയുന്ന മഴ.
ജീന്‍സും ഷര്‍ട്ടും നനഞ്ഞു കുതിര്‍ന്നു. പര്‍ലക്കാമണ്ഡിയിലേക്കുള്ള
മടക്കയാത്രയ്കായി ഓട്ടോറിക്ഷ തയ്യാറായിക്കിടക്കുന്നു.
കയറിയിരുന്നു.
നാലുപേര്‍ കൂടി കയറിയതോടെ വണ്ടി ചലിച്ചു.
മഴ നില്‍ക്കുന്നില്ല.
അങ്ങോട്ടുള്ള യാത്രയില്‍ പശുക്കളുടെ പിന്‍ഭാഗങ്ങളാണെങ്കില്‍ ഇപ്പോള്‍
ചേല നനഞ്ഞൊട്ടിയ ചന്തികളാണ്.
ഒരു വരമ്പത്തുകൂടി നിരനിരയായി നനഞ്ഞു വരുന്നു, പണിക്കാര്‍.
പ്ലാസ്റ്റിക് കവറു കൊണ്ട് ദേഹം മറച്ച് മറ്റൊരു കൂട്ടര്‍.
ഇരു വശവും വയലാണ്.
വയലുകള്‍ക്കും അപ്പുറം മലനിരകള്‍.
നല്ല തണുപ്പ്.
ഇടയ്ക്കിടയ്ക്ക് വശത്ത് കെട്ടിമറച്ച ചാക്ക് കാറ്റത്ത് മാറുമ്പോള്‍
ഒരു കുടം വെള്ളം വീതം ദേഹത്തു വീഴും.
ഇതായിരിക്കും
ഈ മണ്‍സൂണ്‍ ടൂര്‍!

ജഗദീഷ് പറഞ്ഞ കഥ

2011-10-01T10:50:00.002+05:30

ഒക്ടോബര്‍ 2
ഗാന്ധിജയന്തി.
ചിലര്‍ ഗാന്ധിജിയെക്കുറിച്ച്
സംസാരിച്ചു.
ചിലര്‍ ഗാന്ധിജിക്കിഷ്ടപ്പെട്ട ചില
ഭജനകള്‍ പാടി.
ജഗദീഷാകട്ടെ, സത്യത്തെക്കുറിച്ച് ഒരു
കഥയാണ് പറഞ്ഞത്.
അതിങ്ങനെയായിരുന്നു:
.

ഗ്രാമത്തിലായിരുന്നു എന്റെ വീട്

വീടിനു പിന്നിലായി ധാരാളം തെങ്ങുകളുണ്ടായിരുന്നു.

തേങ്ങയിടുവാനായി പണിക്കാരന്‍ വരും.

തേങ്ങകളുടെ എണ്ണമനുസരിച്ചായിരുന്നു കൂലി.

ഞാനും അമ്മയും സഹോദരങ്ങളും കൂടി തേങ്ങകള്‍

താഴെ വീഴുമ്പോല്‍ അവയില്‍ ചിലതെടുത്ത് ഒളിച്ചു വയ്ക്കും.

തെങ്ങുകയറ്റക്കാരനെ പറ്റിക്കാനായിരുന്നു ഇത്. അയാള്‍

താഴെ ഇറങ്ങി നാളികേരങ്ങളുടെ എണ്ണമെടുക്കുമ്പോള്‍

ഒളിച്ചുവച്ചവ ഒഴിവാവും. അങ്ങനെ കൂലിയില്‍ കുറവു വരും.

ഈ കള്ളത്തരത്തിലെ മിച്ചം തികച്ചും തുഛമായിരുന്നു.

എങ്കിലും ഞങ്ങള്‍ ആ പതിവു തുടര്‍ന്നു വന്നു.

പിന്നീട് അമ്മ അസുഖക്കാരിയായി.

കാന്‍സറായിരുന്നു.

അന്നൊരിക്കല്‍ തെങ്ങുകയറ്റക്കാരന്‍ വന്നപ്പോള്‍

അമ്മ കട്ടിലില്‍ അനക്കമില്ലാതെ കിടക്കുകയായിരുന്നു.

ഞങ്ങള്‍ പതിവു തെറ്റിച്ചില്ല.

താഴെ വീണ തേങ്ങകളില്‍ ചിലത് പണിക്കാരന്‍ കാണാതെ

എടുത്തു ചായ്പിലേക്കിട്ടു.

എന്നാല്‍ അന്ന് അമ്മ പറഞ്ഞു

അവയെല്ലാമെടുത്ത് പുറത്തേക്കിട്ടേക്കൂ.

ചെറുതെങ്കിലും അത്തരം കള്ളങ്ങള്‍ പോലും അവരുടെ

അപ്പോഴത്തെ അവസ്ഥയ്ക്ക് കാരണമായിരിക്കാമെന്ന് അവര്‍

ഭയപ്പെട്ടിരുന്നോ?

നീന്തല്‍ പരിശീലനം!

2011-09-01T16:08:00.001+05:30

സ്കൂളിന്റെ ഗേറ്റുകടന്നപ്പോഴേ കണ്ട കാഴ്ച
എന്നെപ്പോലൊരു വായീനോക്കിക്ക് സന്തോഷം പകരുന്നതായിരുന്നു.
രണ്ടു രാജസ്ഥാനി പെണ്ണുങ്ങള്‍ ദാ നിന്നു കുളിക്കുന്നു!
സ്കൂളിന് വേനലിന്റെ അവധിയാണ്. അറ്റകുറ്റപ്പണികള്‍ നടക്കുന്നു.
ഇവര്‍ പണിക്കാരികളാണ്. ജോലിയൊക്കെക്കഴിഞ്ഞ് വൈകുന്നേരത്തെ കുളി പാസ്സാക്കുമ്പോഴാണ്
അപ്രതീക്ഷിതമായ ഞങ്ങളുടെ വരവ്.
എന്തായാലും കണി കുഴപ്പമില്ല.
ഞങ്ങള്‍ക്ക് രാ പാര്‍ക്കാനായി പറഞ്ഞുവച്ചിരുന്ന ക്ലാസ്സുമുറികളിലേക്ക് കാവല്‍ക്കാരന്‍
കൂട്ടിക്കൊണ്ടു പോയി.

പത്തുദിവസത്തെ സാഹസിക സഹവാസത്തിനായി
പടിഞ്ഞാറന്‍ ഹിമാലയത്തിലേക്കുള്ള യാത്രയാണ്.
നാല്പതു കുട്ടികള്‍. നാലദ്ധ്യാപകര്‍.
ദില്ലി വരെ ട്രെയിന്‍.
ഒരു രാത്രി വിശ്രമം - ആന്‍ഡ്രൂ ഗഞ്ചില്‍.
വെളുപ്പിന് മനാലിയിലേക്കുള്ള ബസ് വരും.

ആന്‍ഡ്രൂ ഗഞ്ച് -
ദില്ലിയുടെ ഗാംഭീര്യം ഉയര്‍ത്തിക്കാട്ടുന്ന വിശാലമായ കാമ്പസ്.
തണല്‍ മരങ്ങള്‍.
ചെത്തിമിനുക്കിയ പുല്‍ത്തകിടി. ചിട്ടയോടെ വളര്‍ത്തുന്ന ചെറു മരങ്ങള്‍, ചെടികള്‍.
ഒരു അരമതിലിനപ്പുറത്തായി ചെറുതും വലുതുമായി കുറേ പുത്തന്‍ കാറുകള്‍ പാര്‍ക്ക് ചെയ്തിരിക്കുന്നു.
കാറുകള്‍ക്കെന്താ ഇവിടെ കാര്യം എന്നു ചിന്തിച്ചു നടക്കുമ്പോഴുണ്ട്
വെട്ടിത്തിളങ്ങുന്ന വെള്ളം!
ഒരു ചെറിയ വിക്കറ്റ് ഗേറ്റിനപ്പുറത്ത് കണ്ണാടിച്ചുവരുകള്‍, പിന്നെ
ഒരു സ്വിമ്മിങ് പൂള്‍! നിറയെ
കുളിക്കാനെത്തിയവര്‍!!

മൂന്നു ദിവസത്തെ മുഷിപ്പും വിയര്‍പ്പും ഒട്ടലുമായിക്കഴിഞ്ഞ ഞങ്ങള്‍
കയം കണ്ട കന്നുകളെപ്പോലെ കയറുപൊട്ടിക്കാനാഞ്ഞു.

ഒരു സ്വകാര്യ സ്പോര്‍ട്ട്സ് കോം‌പ്ലക്സാണ്.
താഴെ നീന്തല്‍ക്കുളം. മുകളില്‍ മള്‍ട്ടി ജിം.
സ്കൂളിനടുത്തായി ഇതൊക്കെ കൊണ്ടു വച്ച ആളുകളെ സമ്മതിക്കണം.
ഇവിടെ പഠിക്കുന്ന കുട്ടികളുടെ ഏകാഗ്രതയെപ്പറ്റി ഉത്ഘണ്ടപ്പെട്ടുകൊണ്ടും
തല കുളത്തിനു നേരേ തന്നെ പിടിച്ചുകൊണ്ടും ഞാന്‍ മുറിയിലേക്കു നടന്നു.
കാന്റീന്‍ കാരന്‍ സ്ഥലത്തുണ്ടായിരുന്നു. ആള് ഒരു കോള് മണത്ത് എത്തിയതാണ്.
എല്ലാവര്‍ക്കും ചപ്പാത്തിയും ചിക്കന്‍ കറിയും ഏര്‍പ്പാടാക്കി.
കുളി, നന എന്നിവയ്ക്കായി കുളിമുറികള്‍ മാത്രം ഉപയോഗിക്കാന്‍ കുട്ടികളോട്
ചട്ടം കെട്ടിയിട്ട് പുറത്തിറങ്ങി.
സ്വിമ്മിങ് പൂള്‍ നിലാവു പോലെ തിളങ്ങുന്നു.
.
മത്തായി ദില്ലിയിലുണ്ട്.
മത്താകാന്‍ പറ്റിയ എന്തെങ്കിലുമായി വരാന്‍ ഫോണ്‍ ചെയ്തു പറഞ്ഞു.
.
‘കുളത്തിലിറങ്ങിയാലോ’.. അരുണ്‍ കുമാര്‍ ആരാഞ്ഞു.
അകത്തു കയറ്റുമോ? എനിക്കു സംശയം.
ഒരു കൈ നോക്കാം.
ഗേറ്റു കടന്ന് അകത്തു കയറി.
കുളം പരിപാലകരിലൊരാളോട് അരുണ്‍ ആഗ്രഹം പറഞ്ഞു.
ഈ സമയം ഇനി ഒരുപക്ഷേ പ്രവേശനം നിഷേധിച്ചാലും വലിയ
നഷ്ടമൊന്നും വരാത്ത രീതിയില്‍ ഞാന്‍ എന്റെ കണ്ണുകളുടെ ഷട്ടറുകള്‍
രണ്ടും മാക്സിമം തുറന്നു പിടിച്ച് പാന്‍ ചെയ്തുകൊണ്ടിരിക്കുകയായിരുന്നു.
ചെറു പരിപാലകന്‍ എന്തായാലും വിരോധമൊന്നും പറഞ്ഞില്ല.
എനിക്ക് ഒന്നും അങ്ങോട്ടു വിശ്വസിക്കാന്‍ കഴിയുന്നില്ല.
തിരുവനന്തപുരത്തെ വാട്ടര്‍വര്‍ക്സ് സ്വിമ്മിങ് പൂളേ ഞാന്‍ ആകെ കണ്ടിട്ടുള്ളൂ.
അവിടെയാണെങ്കില്‍ ആണുങ്ങള്‍ക്കും പെണ്ണുങ്ങള്‍ക്കും വേറേ വേറേ സമയവും.
ഇവിടെയോ
എല്ലാം കൂടി ദാ കിടക്കുന്നു വെള്ളത്തില്‍.
നീന്തല്‍ക്കുളം മുഖ്യകാര്യദര്‍ശി അപ്പോള്‍ അവിടേക്കു വന്നു.
അലക്സാണ്ടര്‍ ചക്രവര്‍ത്തി താടിയും തലപ്പാവും വച്ച പോലെ ഒരു സര്‍ദാര്‍ജി.
ആറരയടി പൊക്കം. വെളുത്തു ചുവന്ന നിറം. കറുത്ത താടിയും മീശയും.
ഓടിക്കളഞ്ഞാലോ എന്നാണ് ആദ്യം തോന്നിയത്.
പരിപാലകന്‍ ഞങ്ങളെ അദ്ദേഹത്തിനു പരിചയപ്പെടുത്തി.
കേരളത്തില്‍ നിന്നാണ് വരവ് എന്നറിഞ്ഞതോടെ സര്‍ദാര്‍ജിക്കു ഞങ്ങളെ
പെരുത്തിഷ്ടമായി. കേരളം... ഗോഡ്സ് ഓണ്‍ കണ്ട്രി... എന്നൊക്കെ പറഞ്ഞ്
പൊട്ടിച്ചിരിച്ച് പുള്ളി കൈ വാങ്ങിക്കുലുക്കി.
അരുണ്‍ ഞങ്ങളുടെ ആഗമനോദ്ദേശം വെളിപ്പെടുത്തി.
ഒരു കുഴപ്പവുമില്ല.
പക്ഷേ കോസ്റ്റ്യൂം വേണം. ഞങ്ങള്‍ക്ക് ആകെയുള്ളത്
പാന്റ്സിനുള്ളിലുള്ള ഫ്രെഞ്ചി എന്ന അടിവസ്ത്രമാണ്.
അത് ഇവിടെ ചിലവാവില്ല.
കുട്ടികളുടെ പക്കല്‍നിന്നും നിക്കറോ ബര്‍മുഡയോ കടം വാങ്ങാമെന്നു വച്ചാല്‍
അതും ഇവിടെ എടുക്കത്തില്ല. നീന്തല്‍ വേഷം തന്നെ വേണം.
കുളിച്ചിട്ടേ കുളത്തിലിറങ്ങാവൂ എന്നതായിരുന്നു രണ്ടാമത്തെ കണ്ടീഷന്‍.
അപമാനിക്കാന്‍ പറഞ്ഞതല്ല. ആദ്യം ഷവര്‍ പിന്നെ ഷവര്‍മ.
ഓരോരോ രീതികളേ.
പുരുഷന്മാരുടെ വസ്ത്രം മാറുന്ന മുറിയിലൂടെ അങ്ങോട്ടുമിങ്ങോട്ടും നടന്നു നോക്കി.
ആരെങ്കിലും നിക്കറു മറന്നു വച്ചിട്ടുണ്ടോ എന്ന്.
തടിയന്മാരായ പഞ്ചാബികളും ഹരിയാനക്കാരും ജട്ടിയിട്ടും തോര്‍ത്തുടുത്തും നിന്ന്
പല പല പോസുകളില്‍ കുളിക്കുന്നതിനിടെ ചില സിനിമകളിലെ ഹാസ്യതാരങ്ങളെപ്പോലെ
ഞങ്ങള്‍ ജട്ടി തപ്പി നടന്നു.

കുളിവസ്ത്രമില്ലാതെ, കുളിക്കാതെ നാണം കെട്ട്
എങ്ങനെ മടങ്ങിപ്പോകുമെന്നു കരുതിയപ്പോഴാണ്
സര്‍ദാര്‍ജി വീണ്ടും പ്രത്യക്ഷനായത്.
റിസപ്ഷന്‍ കൌണ്ടറില്‍ നിന്നും രണ്ട് പുരാതന ജട്ടികള്‍
മൂപ്പര്‍ ഏര്‍പ്പാടാക്കി.
ഒന്ന് വലുത്. മറ്റേത് ചെറുത്.
ന്യായമായിട്ടും വലുത് എനിക്കാണ് കിട്ടേണ്ടത്.
എന്നാല്‍ അരുണ്‍കുമാര്‍ ഒറ്റ ഡൈവിന് അതു കൈക്കലാക്കി.
എനിക്കോ.. എങ്ങും എത്താത്ത മറ്റേതും.
വെള്ളത്തിനടിയിലല്ലേ സാരമില്ല... എന്നു സമാധാനിച്ച്
എങ്ങനെയോ അത് അവിടം വരെ എത്തിച്ച് മറച്ചിട്ട്
ഷവറും കഴിഞ്ഞ് ചാടി കുളത്തിലേക്ക്.
എന്തൊരാനന്ദം.
സ്വര്‍ഗ്ഗം തോറ്റു പോകും.
സുന്ദരിമാരായ പഞ്ചാബി പെണ്ണുങ്ങ്ല് ബിക്കിനിയിട്ടു കുണുങ്ങിക്കുണുങ്ങി വരുന്നു...
പടവിലിരിക്കുന്നു... വെള്ളത്തിലേക്കൂര്‍ന്നിറങ്ങുന്നു.... നീന്തിത്തുടിക്കുന്നു.
നീന്തലറിയാത്ത ഞാനോ.. മുങ്ങിയും പൊങ്ങിയും
അങ്ങോട്ടുമിങ്ങോട്ടും നോക്കി വെള്ളമിറക്കുന്നു.
അരുണ്‍ കുമാര്‍ പണ്ടു പഠിച്ച ചില നീന്തല്‍ പാഠങ്ങളൊക്കെ പരീക്ഷിച്ചു തുടങ്ങി.
ഞാന്‍ കൂടെ ‘നടന്നു’.
അപ്പോള്‍ ഒരു മാന്യ ദേഹം എന്റെ നേരേ വളരെ കഷ്ടപ്പെട്ടു നീന്തിയടുത്തിട്ട്
ചോദിക്കുകയാണ്:
“താങ്കളാണോ ഇവിടുത്തെ നീന്തല്‍ പരിശീലകന്‍?”
ഞാന്‍ എന്റെ ഉത്തരം വിഴുങ്ങി.

മത്തായി ജുവാന്‍ എന്ന തന്റെ മകനേയും കൊണ്ടാണു വന്നത്.
മനസ്സില്ലാ മനസ്സോടെ കരയ്കുകയറി.
കൈപ്പത്തിയടയാളത്തില്‍ നാണം കെടാതെ ചെയ്ഞ്ചിങ് റൂമുവരെ
എത്തിപ്പറ്റി. വീണ്ടും ഒരു ഷവര്‍.
ജട്ടിയൂരി ഭദ്രമായി തിരികെ ഏല്‍പ്പിച്ചു. വഷളന്മാര്‍ ഇനിയും വന്നേക്കും.

പുല്‍ത്തകിടിയില്‍ മരങ്ങള്‍ നിലാവു മറയ്കുന്ന ഒരു കോണിലിരുന്ന്
മത്തായി മാറാപ്പഴിച്ചു. കടിച്ചാല്‍ പൊട്ടാത്ത പേരുള്ള ഒരു വോഡ്ക.
കുട്ടികള്‍ കുളിയും നനയും കഴിഞ്ഞ് പുറത്തിറങ്ങിത്തുടങ്ങി.

ആരോ പറഞ്ഞു “ കാന്റീനില്‍ ചപ്പാത്തിയും ചിക്കനും റെഡി”

.

റെനേ യുടെ ‘കുളിക്കാര്‍’ എന്ന ചിത്രം (1887)

മാന്‍‌ചെസ്റ്റര്‍കാരി അഥവാ ഒരു അമളി.

2011-08-29T18:43:00.000+05:30

കഴുത കാമം കരഞ്ഞു തീര്‍ക്കും.
ഞാനോ?
കുടുംബത്തില്‍ നിന്നകന്നുള്ള ഈ പൊറുതി
വല്ലാതെ ബുദ്ധിമുട്ടിച്ച ഒരു വൈകുന്നേരം
ഗൌതമബുദ്ധനെപ്പോലെ ഞാന്‍ തെരുവിലൂടെ അലഞ്ഞു.
കൊട്ടും പാട്ടുമായി ഒരു ശവയാത്ര..
തിക്കിലും ഓരത്തെ കുളികള്‍..
പന്നികള്‍, എരുമകള്‍, പശുക്കള്‍, കഴുതകള്‍, പട്ടികള്‍..
പിന്നെ, മനുഷ്യര്‍..
ഇത് ഒറീസ്സ ആന്ധ്രയെ ഉരസുന്ന പര്‍ലക്കമണ്ടി.
രഥോത്സവത്തിന്റെ ആരവം, മരണക്കിണറിലെ മുരളല്‍,
മാജിക് ഷോയ്ക്ക് ആളെ കൂട്ടുന്ന മൈക്കുകാരന്റെ തമാശകള്‍,
നിര നിരയായി പലഹാരങ്ങള്‍..
ഒടുവില്‍..
പ്രകാശം പരത്തുന്ന ഒരു ക്ഷേത്രം.
നിന്നു.
ഉള്ളില്‍ കയറി.
ഹനുമാന്റെ അമ്പലമാണ്.
തൊഴുതു പുറത്തിറങ്ങി.
പഴക്കമുള്ള കെട്ടാണ്.
ചുവന്ന കരിങ്കല്ല്.
കൊത്തുപണികള്‍ മനോഹരം.
വലത്തുവച്ച് ചുവരുകളില്‍ നോക്കിയപ്പോള്‍ ഉണ്ടായത്
ബോധോദയം!
നിറയെ രതിശില്പങ്ങളാണ്.
എന്നിലെ സ്വാര്‍ഥനായ കലാകാരന്‍ ഉണര്‍ന്നു.
ബോറടിക്കൊരു പരിഹാരം ഇതാ.
ദിവസവും ഇവിടെ വന്ന് ഓരോ ശില്പങ്ങള്‍ പകര്‍ത്തിവരയ്ക്കാം.

കല്യാണരാമന്‍ എന്ന സിനിമയില്‍ ഇന്നസെന്റിന്റെ കഥാപാത്രത്തോട്
ഒരാള്‍ ചോദിക്കുന്നുണ്ട് കല്യാണം കഴിക്കാത്തതില്‍ താങ്കള്‍ക്ക് ഒരു വിഷമവുമില്ലേ എന്ന്.
അപ്പോള്‍ ഇന്നസെന്റിന്റെ മറുപടി ഇതാണ്. “കല്യാണം കഴിക്കണമെന്നു തോന്നുമ്പോള്‍
ഞാനൊരു ഉരുളിയെടുത്ത് അടുപ്പത്തു വയ്ക്കും. എന്നിട്ട് എണ്ണയൊഴിച്ച് ചൂടാക്കും.
എന്നിട്ട് ഒരു കെട്ട് പപ്പടമെടുത്ത് അതില്‍ നിന്ന് ഓരോന്ന് ദിങ്ങനെ ശീ ശീന്ന്
എണ്ണേലേക്കിടും . അപ്പോ എല്ലാ വിഷമവും മാറും!”

അങ്ങനെയാണു ഞാന്‍ എന്റെ പപ്പടക്കെട്ടുമായി ഹനുമാന്‍ കോവിലിലെ
നിത്യസന്ദര്‍ശകനായത്.
ഇരുനൂറു കൊല്ലത്തെ പഴക്കമുള്ള ക്ഷേത്രമാണ്.
കരിങ്കല്ലിലെ കൊത്തുപണികളില്‍ പിന്നീടും ആരോ
ഒരു പണി പണിഞ്ഞിട്ടുണ്ട്. ചായം പൂശല്‍!
ക്ഷേത്രത്തിന്റെ ഉടമയെ കണ്ടു.
സംസാരിച്ചു. ഒരു റിട്ടയഡ് അദ്ധ്യാപകനാണ്.
ശില്പങ്ങള്‍ നോക്കി വരയ്ക്കാന്‍ താല്പര്യമുണ്ടെന്നറിയിച്ചു.
സമ്മതം കിട്ടി.

സെമി ഹാര്‍ഡ് പേസ്റ്റല്‍ കൊണ്ട് കടലാസിലും
പിന്നെ മുറിയിലെത്തി, കാന്‍‌വസില്‍ അക്രിലിക്
പെയിന്റു കൊണ്ടും എന്റെ ചിത്രരചനാ - മോഷണം
മുടക്കമില്ലാതെ നടന്നു പോന്നു.

പക്ഷേ.
ഏതോ ഒരു ശില്പിയുടെ മനസ്സില്‍ എന്നോ തോന്നിയ
ഒന്നാം തരമൊരു ആശയം.
കല്ലുളിയാലും ചുറ്റികയാലും പണിതെടുക്കുമ്പോഴേക്കും
അത് രണ്ടാം തരമാവുകയാണ്.
ഞാനത് കോപ്പിയടിക്കുമ്പോള്‍
അത് മൂന്നാം തരമോ നാലാം തരമോ ഒക്കെയായി മാറുന്നു.
വീണ്ടും അതിനെ പകര്‍ത്തിവരയ്കുമ്പോഴേക്കും അത് അതിന്റെ
ഊര്‍ജ്ജമെല്ലം ചോര്‍ന്ന് ഒരു ‘പടം’ മാത്രമായിപ്പോകുന്നു.
ഈ വിചാരങ്ങള്‍ എന്നെ അസ്വസ്ഥനാക്കി.

സത്യത്തില്‍ ഇങ്ങനെയൊക്കെ ചിന്തിക്കാനിടം തന്നത്
ഒരു ചെറിയ മണ്ടത്തരമായിരുന്നു.
അതു പറയാം.
ഒരിക്കല്‍, എത്ര വരച്ചിട്ടും ഒരു ചിത്രത്തിലെ പുരുഷനു പൌരുഷം പോര!
സ്ത്രീക്കാകട്ടെ ചിലതൊന്നും ഇല്ല താനും.
ചെല്ലപ്പ സാര്‍ പണ്ടു പറയുമ്പോലെ മാഞ്ചെസ്റ്റര്‍ കാരിയാണോ എന്ന്
ഒരു സംശയം. ചെസ്റ്റ് കഴിയാം വണ്ണമൊക്കെ കനപ്പിച്ചു നോക്കി. എന്നിട്ടും
മുഴുക്കുന്നില്ല. എന്തോ ഒരിതു പോലെ.
ഒടുവില്‍ ഈ ചിത്രവും ചായവുമായി ഒരികല്‍ക്കൂടി
അമ്പലത്തില്‍ ചെന്ന് പോരായ്മകള്‍ നോ‍ക്കിക്കണ്ട് തിരുത്തിവരയ്ക്കാമെന്നു
തീര്‍ച്ചപ്പെടുത്തി.
ചെന്നു.
നോക്കി.
ശരിക്കും നോക്കി.
അപ്പോഴല്ലേ അമളി മനസ്സിലായത്.
ഞാന്‍ സ്ത്രീയെന്നു കരുതി വരച്ചത് ഒരു പുരുഷശില്പവും
എന്റെ പുരുഷന്‍ ഒരു സ്ത്രീ ശില്പവും ആയിരുന്നു!
ആ പോസ് ആണ് ചതിച്ചത്.
(ഇത്രയും കേമികളായ പെണ്ണുങ്ങളുണ്ടോ! ഹും!)

എന്തായാലും അതിനു ശേഷം പേപ്പറില്‍ വരച്ചിട്ട് വീണ്ടും
കോപ്പി ചെയ്യുന്ന പരിപാടി നിര്‍ത്തി. കാന്‍‌വസുമായി നേരേ
അമ്പലത്തില്‍ ചെല്ലുക. അവിടെ കുത്തിയിരുന്നു വരയ്ക്കുക.
അബദ്ധം ഇനിയും പറ്റരുതല്ലോ.
നാലാം തരത്തില്‍ നിന്നും ഒരു പടി ഉയരുകയും ആവാം.
ശുഭം.

ശാന്തനായ കഴുത - പര്‍ലക്കമുണ്ടി

ഇനി ലൂസിയന്‍ ഫ്രോയ്ഡിന്റെ ചിത്രങ്ങള്‍ മാത്രം.

2011-07-23T08:24:00.003+05:30

സിഗ്‌മണ്ട് ഫ്രോയിഡിന്റെ കൊച്ചുമകനും പ്രശസ്ത ബ്രിട്ടീഷ് ചിത്രകാരനുമായ
ലൂസിയന്‍ ഫ്രോയ്ഡ് (88) ന്യൂയോര്‍ക്കില്‍ വച്ച് കഴിഞ്ഞ ബുധനാഴ്ച നിര്യാതനായി.

അദ്ദേഹത്തിന്റെ ഒരു ഛായാ ചിത്രവും ‘പെണ്ണും വെളുത്ത പട്ടിയും’ എന്ന ചിത്രവും താഴെ:

ഫ്രോയ്ഡിന്റെ കൂടുതല്‍ ചിത്രങ്ങള്‍ ഇവിടെ കാണാം.
ഇദ്ദേഹം 1995ല്‍ വരച്ച ഒരു നഗ്ന ചിത്രം ജീവിച്ചിരിക്കുന്ന ചിത്രകാരന്മാരുടെ ചിത്രങ്ങള്‍ക്ക്‌ ലഭിക്കുന്ന ഏറ്റവും വലിയ ലേലത്തുകയ്ക്ക്‌ വിറ്റുപോയിരുന്നു. അത് ഇവിടെ കാണാം.

രാഷ്ട്രീയക്കാരന്‍

2011-05-14T00:21:00.004+05:30

.
നന്നായി പശമുക്കി അലക്കി തേച്ച ഖദര്‍ ഉടുപ്പ്.
വെളുത്ത മുണ്ട്. വൃത്തിയായി ചായം പുരട്ടിയ തലമുടി.
വെട്ടിയൊതുക്കിയ മേല്‍ മീശ.
വടിച്ചു വെടിപ്പാക്കിയ മുഖം.
പുഞ്ചിരി.
പോളിങ് ഏജന്റാണ്.
കുടിക്കുന്നത് കേസ് പൊട്ടിച്ചെടുക്കുന്ന
അക്വാഫിനായുടെ മിനറല്‍ വാട്ടര്‍.
ആകെ മൊത്തം എന്തൊരാഭിജാത്യം.
എന്തൊരു സൌമ്യത.

വോട്ടെണ്ണല്‍ കേന്ദ്രത്തില്‍ മൊബൈല്‍ ഫോണ്‍
നിരോധിച്ചിരുന്നു.
എങ്കിലും ചിലരെല്ലാം രഹസ്യമായി ഫോണുപയോഗിക്കുകയും
ഫ്ലാഷ് ന്യൂസുകള്‍ കയ്‌മാറുകയും ചെയ്തു.
ഇങ്ങനെ പ്രചരിച്ച വാര്‍ത്തകള്‍ പലതും ശുദ്ധ അസംബന്ധമായിരുന്നെന്ന്
പിന്നീടാണ് മനസ്സിലാക്കിയത്.
മഞ്ചേശ്വരത്ത് ബി.ജെ.പി ജയിച്ചു എന്നതായിരുന്നു അതിലൊന്ന്!
ഈ സമയം ഇവിടെ ആകെ ഒരു റൌണ്ട് എണ്ണലേ കഴിഞ്ഞിരുന്നുള്ളൂ.
കൌണ്ടിങ്ങ് ഡ്യൂട്ടിക്കായി വന്നവര്‍ അസ്വസ്ഥരായി.
രണ്ടാം റൌണ്ട് എണ്ണാനായി വോട്ടിങ് മെഷീന്‍ ഇതുവരെ എത്തിച്ചിട്ടില്ല.
ഇങ്ങനെ പോയാല്‍ ഒരു മണിയെങ്കിലുമാകും.

ശുഭ്രവസ്ത്രധാരി പോളിങ് ഏജന്റ് മസിലുപിടിച്ചിരിക്കുകയാണ്.

ഞാന്‍ അദ്ദേഹത്തോടു പറഞ്ഞു.
നിങ്ങളൊക്കെ വളരെ ഡീസന്റായതാ കുഴപ്പം.
അതയാള്‍ക്കതു ‘ക്ഷ‘ പിടിച്ചു.
തന്റെ ഡീസന്‍സി അല്പനേരത്തേക്ക് മാറ്റിവയ്ക്കാന്‍ തന്നെ
ആ യുവ നേതാവ് തീരുമാനിച്ചു.
“എന്തോ ഒണ്ടാ‍ക്കുവാടാ അവിടെ...
പെട്ടിയെന്താ കോണാത്തീ വച്ചേക്കുവാന്നോ... “
എന്നു തുടങ്ങി അത്രനേരവും കാത്തുസൂക്ഷിച്ചിരുന്ന എല്ലാ മാന്യതയും
കളഞ്ഞ് ചങ്ങാതി ബാരിക്കേഡില്‍ ചവിട്ടി അലറാനും കൂവാനും തുടങ്ങി.
കൂട്ടിന് കുറേ കൂട്ടുകാരും.
രാഷ്ട്രീയക്കാരന്‍ തനി രാഷ്ട്രീയക്കാരനായി!
എന്തായാലും പിന്നെ വോട്ടെണ്ണല്‍ ശരവേഗത്തിലായിരുന്നു.
പെട്ടിയൊക്കെ എപ്പ വന്നെന്നു ചോദിച്ചാല്‍ മതി.

മറുപടി പ്രസംഗം

2011-05-14T00:04:00.001+05:30

പാബ്ലോ പിക്കാസോ എന്ന വിഖ്യാത ചിത്രകാരന്‍ ഒരിക്കല്‍ പറഞ്ഞു..
“എല്ലാ കുഞ്ഞുങ്ങളും കലാകാരന്മാരാണ്.. എന്നാല്‍ പ്രശ്നം എന്തെന്നാല്‍
വളരുമ്പോഴും അവര്‍ കലാകാരന്മാരായി തുടരുന്നതെങ്ങനെ എന്നതാണ്!”

എന്റെ ബാല്യം കുട്ടിക്കഥകളും ചിത്രങ്ങളും നിറഞ്ഞതായിരുന്നു.
അച്ഛന്‍ തിരുവനന്തപുരം പബ്ലിക് ലൈബ്രറിയിലെ ഒരു ലൈബ്രേറിയന്‍.
വായിച്ച പുസ്തകങ്ങള്‍ക്ക് കണക്കില്ല.
വരച്ച ചിത്രങ്ങള്‍ക്കും.
കുട്ടിക്കാലത്തെ ഏറ്റവും വലിയ വിനോദം പുസ്തകങ്ങളുണ്ടാക്കിക്കളിക്കുകയായിരുന്നു.
വെളുത്ത താളുകളുള്ള ത്രിവേണി നോട്ടുബുക്കുകള്‍ കീറി മടക്കി തുന്നിക്കെട്ടും.
കഥകളും ലേഖനങ്ങളും ചിത്രീകരണങ്ങളുമെല്ലാം സ്വന്തമായിത്തന്നെ.
വായനക്കാരായി കൂട്ടുകാരും.
വളരുമ്പോഴും ഈ കളിയൊക്കെ തുടരാനെന്നെ സഹായിച്ചത്
എന്റെ ഫൈന്‍ ആര്‍ട്സ് കോളേജിലെ പഠനവും കലാദ്ധ്യാപകന്‍ എന്ന തസ്തികയുമാണ്.

കുട്ടികള്‍ക്ക് കഥ കേള്‍ക്കാന്‍ കൊതിയാണ്.
ഒന്നിലേയും രണ്ടിലേയും കുട്ടികള്‍ക്ക് നിങ്ങള്‍
ഒന്നോ രണ്ടോ കഥ പറഞ്ഞു കൊടുത്തുനോക്കൂ.
പിന്നെ ആര്‍പ്പുവിളികളോടെയായിരിക്കും നിങ്ങളെ അവര്‍
ക്ലാസ്സിലേക്ക് എതിരേല്‍ക്കുക.
.
ഒരിക്കല്‍ ഒരു സുഹൃത്തിനോടൊപ്പം ബൈക്കില്‍
യാത്ര ചെയ്യുമ്പോ
ഒരു ചെറിയ കുട്ടി വഴിയരികില്‍ നിന്ന്
അതിരറ്റ സന്തോഷത്തോടെ എന്നെ നോക്കി തുള്ളിച്ചാടുന്നതു കണ്ടു.
സുഹൃത്ത് ചോദിച്ചു:
എന്തായിത്?
ആ കുട്ടിയെന്തിനാ നിന്നെ നോക്കി
‘അച്ഛാ, അച്ഛാ’ എന്നു നിലവിളിക്കുന്നത്?
അച്ഛാ, അച്ഛാ എന്നല്ല,
ആര്‍ട്ട് സാര്‍, ആര്‍ട്ട് സാര്‍ - എന്നാണവന്‍ വിളിക്കുന്നത്
ഞാന്‍ തിരുത്തി.

ചിത്രം വരയ്ക്കാനും
കഥകള്‍ പറയാനും
കുട്ടികളോടൊത്തുല്ലസിക്കാനും
കുട്ടിക്കാലത്തെപ്പോലെ
ഇന്നും കഴിയുമാറാക്കിയതാരായാ‍ലും
അവനോ
അവള്‍ക്കോ
ഞാന്‍ നന്ദി പറയുന്നു.
ഒപ്പം എനിക്കവസരങ്ങള്‍ തന്ന ബാലസാഹിത്യ ഇന്‍സ്റ്റിറ്റൂട്ടിനും.
.

(സാംസ്കാരിക വകുപ്പു മന്ത്രി സ: എം. എ. ബേബിയുടെ പക്കല്‍ നിന്നും

ഇക്കൊല്ലത്തെ മികച്ച ചിത്രപുസ്തകത്തിനുള്ള ബാലസാഹിത്യ അവാര്‍ഡ്

സ്വീകരിച്ച ശേഷം പറഞ്ഞ മറുപടിപ്രസംഗം.)

മാതൃഭൂമിക്ക് മാപ്പില്ല!

2011-05-03T09:04:00.000+05:30

പണ്ടൊരിക്കല്‍ മാലിദ്വീപില്‍ ഇന്ത്യന്‍ സൈന്യം ഇറങ്ങിയപ്പോള്‍
ആഫ്രിക്കയിലെ മാലിയുടെ ഭൂപടം അച്ചടിച്ച് മാതൃഭൂമി ഒന്നു ഞെട്ടിച്ചതാണ്.
ഇപ്പോ ഇതാ ഇന്നത്തെ പത്രത്തില്‍ കാഷ്മീര്‍ പാക്കിസ്ഥാന്റെ കൂടെ!
.

.
പിന്നെ ഒരു സമാധാനമുള്ളത് പാക്കിസ്ഥാന്റെ സ്ഥാനം മാതൃഭൂമിയുടെ മാപ്പു പ്രകാരം
ലാദനൊപ്പം കടലിലാണെന്നുള്ളതാണ്.
.

ഇളയരാജയുടെ ചിത്രങ്ങള്‍

2011-04-29T11:10:00.001+05:30

ബംഗളുരുവിലെ അബ്സ്ട്രാക്റ്റ് ആര്‍ട്ട് ഗാലറിയില്‍ കഴിഞ്ഞ മാസം ശ്രദ്ധേയമായ ഒരു ചിത്രപ്രദര്‍ശനം നടന്നു. തമിഴ്‌നാട്ടുകാരനായ യുവചിത്രകാരന്‍ ഇളയരാജ ഇതുവരെ കാണാഞ്ഞ ചില ദ്രാവിഡ മുഖങ്ങളാണ് തന്റെ എണ്ണച്ചായച്ചിത്രങ്ങളിലൂടെ കാഴ്ചവച്ചത്. ഗ്രാമീണതയുടെ നിഷ്കളങ്ക ഭാവങ്ങളും നിഴലിന്റേയും വെളിച്ചത്തിന്റെയും അനുപമ മേളനങ്ങളും ചിത്രങ്ങളില്‍ ജീവന്‍ തുടിപ്പിക്കുന്നു.

ഇളയരാജയുടെ കൂടുതല്‍ ചിത്രങ്ങള്‍ ഇവിടെ കാണാം.

ചൈനാ ടൌണ്‍ - ആഭാസങ്ങളുടെ ആഘോഷം.

2011-04-17T11:10:00.000+05:30

കിങ് ഫിഷര്‍ എയര്‍ലൈന്‍സ് ക്രൂവിനേപ്പോലും നാണിപ്പിക്കുമാ‍റ് ടൈറ്റായ ഒരു സ്കര്‍ട്ട് ധരിച്ച് രഞ്ജിനി ഹരിദാസ് അവതരിപ്പിച്ച ഒരു പ്രമോഷണലാണ് എല്ലാത്തിനും വഴിമരുന്നിട്ടത്. ടി വി യിലൊക്കെ വലിയ പരസ്യമായിരുന്നു.
സ്റ്റാര്‍സിങ്ങേഴ്സിലെ കുട്ടികള്‍.. ഒരു തടിയന്‍ സുമോ ഗുസ്തിക്കാരന്‍... ഒപ്പം.. മോഹന്‍ ലാല്‍, ദിലീപ്, ജയറാം.. കാവ്യാ മാധവന്‍.. ജഗതി.. സുരാജ് വെഞ്ഞാറന്മൂട്....എത്ര മോഹനമായ താരനിര. പേരും പ്രമാദം. ‘ചൈനാ ടൌണ്‍’. വലിയ പ്രതീക്ഷയായിരുന്നു!

കോമടി, വെള്ളമടി, മുഖമ്മൂടി...
.
കോമടിയേയാണിപ്പോള്‍ ഏറ്റവും പേടിക്കേണ്ടത്.
ഒന്നു ചിരിച്ചു പോയാല്‍ പോയി. കാ‍ഴ്ചക്കാരോട് പിന്നെ എന്തും കാണിക്കാനുള്ള
ലൈസന്‍സായി സിനിമക്കാര്‍ക്ക്.
സുരാജിന്റെ വെഞ്ഞാറന്മൂടന്‍ തമാശകളും മോഹന്‍ ലാലിന്റെ ഹലോ, ഛോട്ടാ മുമ്പൈ പകര്‍പ്പുകളും ദിലീപിന്റെയും ജയറാമിന്റെയും മിമിക്സ് നമ്പറുകളും രസിപ്പിച്ചു എന്നത് സത്യം. എന്നാല്‍ മിഠായി നല്‍കി പീഡിപ്പിച്ചു എന്നൊക്കെ പത്രത്തില്‍ വായിച്ചതുപോലെ ആയിപ്പോയി പിന്നീട്.

കൊടുവാള്‍
.
വെള്ളമടിക്കാരനായി ദിലീപ് വന്ന് പടമാകെ വാളുവെച്ചു തുടങ്ങിയതോടെ തുടങ്ങി വൃത്തികേടുകളുടെ ഘോഷയാത്ര. ആശുപത്രിയിലെ കയ്യും കാലും ഒടിഞ്ഞ രോഗികളെ ഉപദ്രവിക്കുന്നതാണ് ഇയാളുടെ വലിയ ലുട്ടാപ്പിത്തമാശ.
ബ്രൌണ്‍ ഷുഗര്‍ എന്ന പേരില്‍ സ്ഥിരമായി സിനിമകളില്‍ കാണാറുള്ള പ്ലാസ്റ്റിക് സാഷേകളില്‍ കിട്ടുന്ന വെളുത്ത പൊടി സമൃദ്ധമായി കുടഞ്ഞിട്ടു കലക്കിയ വിവിധതരം മദ്യങ്ങള്‍ മടമടാമോന്തുന്ന നായകന്മാരുടെ ദൃശ്യങ്ങള്‍ ‘കടന്നു പോയി’ എന്നു പറഞ്ഞാല്‍ പോര.
ഈ വെള്ളത്തിനും വാളിനു മൊക്കെ മീതേ ജാസി ഗിഫ്റ്റിന്റെ ശവം പലപ്പോഴും ഒഴുകിനടക്കുന്നുണ്ടായിരുന്നു.

യുക്തിക്കു ടാറ്റ

വോട്ടെടുപ്പു ദിനം വരെ കടിച്ചു പിടിച്ചുചിരിച്ചുനിന്ന ചില രാഷ്ട്രീയക്കാരേപ്പോലെയായിപ്പോയി പിന്നെ സിനിമയുടെ പോക്ക്. വെള്ളമടിച്ചാല്‍ പിന്നെ എന്തുമാകാം എന്ന ദിലീപിന്റെ കണ്ടുപിടിത്തം പ്രേക്ഷകരോടു കാട്ടിയ കൊടിയ പോക്രിത്തരമായിപ്പോയി. രണ്ടാം പകുതി അക്ഷരാര്‍ത്ഥത്തില്‍ പ്രേക്ഷകരുടെ യുക്തിയെയും ചിന്തയേയും പരുപരുത്ത സിമന്റു തറയിലിട്ടമര്‍ത്തിയുരയ്കുമ്പോലെയായിപ്പോയി.

മുഖമ്മൂടി ധരിക്കലും വെള്ളമടിക്കലും ഒരുമിച്ചായാല്‍ പിന്നെ സിനിമക്കാര്‍ക്ക് വട്ടിളകും!

മാന്നാര്‍ മത്തായിയിലും റാം ജി റാവുവിലുമൊക്കെ കണ്ട അതേ കോപ്രായം. (അന്നു പിന്നെ ഇന്നസെന്റാണെന്നു കരുതി ക്ഷമിച്ചു.)

മറ്റാരും തിരിച്ചറിയാതിരിക്കാനായി മുഖമ്മൂടി വച്ച നായകന്മാര്‍ ഇടയ്ക്കിടെ അതു പൊക്കി മാറ്റി മറ്റുള്ളവരെ നോക്കുന്നത് സിനിമയില്‍ മാത്രം കാണുന്ന ഒരു പ്രതിഭാസമാണ്.

ടൈഗര്‍ ബാം വേണ്ടിവരും

രണ്ടാം പകുതിയില്‍ ആര്‍ക്കും ഒന്നും മനസ്സിലാകുന്നില്ല.

ആകെ പൊട്ടന്‍ കളി. നായകന്മാര്‍ക്കാണെങ്കില്‍ ഒന്നും ഓര്‍മ്മ വരുന്നതേയില്ല!

ചെവി പൊട്ടുന്ന പശ്ചാത്തല സംഗീതം. തലവേദനയെടുക്കാതെ ഈ ഭാഗം കാണാന്‍ കഴിഞ്ഞാല്‍

ഭാഗ്യം.

മരണം മുന്നില്‍ കാണുമ്പോഴും സമനില തെറ്റാതെ പാട്ടു പാടി നൃത്തം ചെയ്യാനും തമാശ പറയാനും ഒക്കെ കഴിയുന്ന താരങ്ങള്‍ക്ക് നന്ദി പറയാതിരിക്കാനാവില്ല.

എന്തെന്നാല്‍ സിനിമ കഴിഞ്ഞ് വീട്ടിലേക്കു പോരുമ്പോള്‍ ബൈക്ക് വല്ല മതിലിലും കൊണ്ടിടിച്ച് തല തല്ലി മരിക്കാതിരിക്കാന്‍ വേണ്ട ആത്മസംയമനത്തിനുള്ള ബാലപാഠങ്ങള്‍ തിയെറ്ററില്‍ വച്ച് ഇവരാണല്ലോ നമുക്കു പകര്‍ന്നു തന്നത്.

ഹൊററും ട്രാജഡിയും

എന്തൊക്കെ പറഞ്ഞാലും എല്ലാം തികഞ്ഞ ഒരു സിനിമ തന്നെയാണ് ചൈനാ ടൌണ്‍!

ജഗതിയും ജാസി ഗിഫ്റ്റുമാണ് ചിത്രത്തിലെ ട്രാജിക് സീനുകള്‍ സംഭാവന നല്‍കിയവര്‍.

കാവ്യയുടെ നൃത്തരംഗത്തിലൂടെ ചിത്രത്തിന് ഒരു ഹൊറര്‍ ഭാവവും ലഭിച്ചിട്ടുണ്ട്. ശ്വാസമടക്കിപ്പിടിച്ചേ ആ ഡാന്‍സ് നമുക്കു കാണാന്‍ കഴിയൂ.

ഹിന്ദിയിലും തമിഴിലും മലയാളത്തിലുമൊക്കെ മുപ്പത്തഞ്ചു കൊല്ലം മുമ്പ് സ്ഥിരമായി കണ്ടിരുന്ന അതേ പ്രതികാര കഥ വീണ്ടും പൊക്കിക്കൊണ്ടുവരാന്‍ കാട്ടിയ ധൈര്യം അപാരം തന്നെ. (ക്വിക് ഗണ്‍ മുരുകന്‍ പോലെ ഒരു പൂര്‍ണ്ണ നോണ്‍ സെന്‍സ് ഫിലിം ആയിരുന്നെങ്കില്‍ പോലും ക്ഷമിക്കാമായിരുന്നു.)

ഇതിനു മോഹന്‍ ലാലേ നിങ്ങളും കൂട്ടു നിന്നല്ലോ!

തുണിയില്ലാതെ നില്‍ക്കുന്ന കൂട്ടുകാരുടെ ലവിടെ നോക്കിയിട്ട് സുരാജ് പറഞ്ഞ അതേ ഡയലോഗേ എനിക്ക് ഇതിന്റെ അണിയറ പ്രവര്‍ത്തകരോടു പറയാനുള്ളൂ.

“എന്തോന്നെഡേ.. ഇതൊക്കെ”.

തര്‍പ്പണം... ദര്‍പ്പണം

2011-03-27T20:33:00.001+05:30

അകാലത്തില്‍ മാഞ്ഞ സുഹൃത്തിന്റെ മരണാനന്തര ചടങ്ങുകള്‍ക്കായി
കാലത്തേ കൈ വിരല്‍ തൊട്ട് ഒരു തുള്ളി കുടഞ്ഞ് കളഞ്ഞ്
തയ്യാറായി.

കര്‍മ്മങ്ങള്‍ നീണ്ടു.
മാലയിട്ട ഛായാചിത്രത്തിനു മുന്നില്‍
അതേ ഛായയുമായി ഒരു നാലുവയസുകാരി
ചിരിച്ചു കളിക്കുന്നു.

നാലു ഭാഗത്തും മുണ്ടുടുത്ത പുരുഷന്മാരുടെ നിശ്ചല ദൃശ്യങ്ങള്‍.
.
വാതില്‍ക്കല്‍ പാതി മറഞ്ഞ വെളുത്ത സ്ത്രീരൂപം.
അതേ മുഖവുമായി തോര്‍ത്തും പട്ടുമുടുത്ത് മകന്‍.
അവന്‍ കൈ നനച്ചു കൊട്ടിയപ്പോള്‍
ബലിക്കാക്ക കരഞ്ഞു.

കാക്ക ഒരു ബൈക്കില്‍ ഇരിക്കുകയായിരുന്നു.
ബൈക്കിന്റെ കൊച്ചു കണ്ണാടിയിലെ പ്രതിബിം‌ബത്തില്‍
കൊക്കും തലയും ഇടിച്ചിടിച്ച് അത് വീണ്ടും വീണ്ടും
കരഞ്ഞു.

വിന്‍സന്റ് വാന്‍ ഗോഗ് വരച്ച
ഗോതമ്പു പാടങ്ങള്‍ക്കു മുകളിലൂടെ പറക്കുന്ന കാക്കകളുടെ ചിത്രം.
.

കുനിച്ചു നിര്‍ത്തി അടി

2011-03-26T13:39:00.000+05:30

എന്തെല്ലാം വീരവാദങ്ങളായിരുന്നു.

കളി കഴിഞ്ഞതോടെ കഥയും കഴിഞ്ഞു.

ഓസ്ട്രേലിയയ്ക്കെതിരെ ‘ആധി’കാരികമായ ജയവുമായി

ഇന്ത്യ സെമിയിലേക്ക് നീങ്ങി.

എന്നാല്‍ ജയത്തെക്കാളേറെ രസിച്ചത്

ഇന്നു പത്രത്തില്‍ കണ്ട ഈ ഫോട്ടോയാണ്.

ഇതുപോലെ ചില അപൂര്‍വ നിമിഷങ്ങളില്‍ ക്ലിക് ചെയ്ത കുറച്ചു ചിത്രങ്ങള്‍

ഒരു സുഹൃത്ത് കഴിഞ്ഞ വാരം അയച്ചു തന്നിരുന്നു.

അവ കൂടി പങ്കു വയ്ക്കട്ടെ.

സിന്ധു ജോയിയും മറ്റു പെണ്ണുങ്ങളും

2011-03-24T23:34:00.000+05:30

ദില്ലി.
ഉമ്മന്‍ ചാണ്ടി, രമേശ് ചെന്നിത്തല, ഒപ്പം സുന്ദരിയായ ഒരു യുവതി.
നേതാക്കള്‍ കാറിനു നേരേ നടക്കുന്നു. യുവതിയും.
റ്റീ വി ക്യാമറക്കാര്‍ വട്ടം കറങ്ങുകയാണ്.
ഉമ്മന്‍ ചാണ്ടി വണ്ടിയുടെ ഡോര്‍ തുറന്നതും അതു വരെ കൂടെ വന്ന
യുവതി ഇപ്രകാരം പറയുന്നു. “ഉമ്മന്‍ ചാണ്ടി സര്‍, ഹൈ കമാന്റ്
എനിക്കു വേണ്ടി വളരെ സ്ട്രോങ്ങായി റെക്കമന്റ് ചെയ്തിട്ടുണ്ട്....”
പേരു പറയുന്നു, പരിചയപ്പെടുത്തുന്നു. മറ്റേ ഡോറിലൂടെ കാറില്‍ കയറിയ
ചെന്നിത്തലയെ നോക്കി ഇത്രകൂടിപ്പറയുന്നു. “രമേശ് ജീ... എന്നോടു പിണക്കമാണോ?..”
.
സ്ഥാനാര്‍ത്തികളെ പ്രഖ്യാപിക്കും മുമ്പ് ഒരു ചാനലില്‍ കാണിച്ചതായിരുന്നു ഈ ദൃശ്യം.
സിന്ധു ജോയ് പാര്‍ട്ടി വിട്ടു പാര്‍ട്ടിമാറിയതായി അറിഞ്ഞപ്പോഴാണ് ഇത് മനസ്സില്‍ വീണ്ടും തികട്ടി വന്നത്.
കോണ്‍‌ഗ്രസിലെ വനിതകളുടെ രാഷ്ട്രീയ പാപ്പരത്തം കാണുമ്പോള്‍ സിന്ധു ജോയിയുടെ ചുവടുമാറ്റം
അവര്‍ക്കും കോണ്‍ഗ്രസിനും വളരെ നല്ലതായിരിക്കും എന്നു തോന്നുന്നു.
.
സിന്ധുവിന്, നല്ലൊരു ഭാവിക്കായി എല്ലാവിധ ഭാവുകങ്ങളും നേരുന്നു.

ട്രാപ്പ്ഡ് അഥവാ റേസ് (ഓടിത്തള്ളിക്കോ...!!!)

2011-03-16T15:43:00.001+05:30

തന്റെ മകളെ രക്ഷിക്കുവാനായി ഒരു അമ്മ സമയവുമായി നടത്തുന്ന ഒരു പന്തയത്തിന്റെ കഥയാണ് ‘ട്രാപ്ഡ്’ (അഥവാ റേസ്). ഡോക്ടര്‍ വില്‍ ജെന്നിങ്സും (കുഞ്ചാക്കോ ബോബന്‍) ഭാര്യ കാരനും (മംത) പെട്ടെന്നൊരു ദിനം തടവുകാരാക്കപ്പെടുന്നു. ഒപ്പം തങ്ങളുടെ ഒരേ ഒരു മകളെ ഇതേ അക്രമികള്‍ തന്നെ തട്ടിക്കൊണ്ടു പോയതായുമറിയുന്നു. ജോ ഹിക്കി (ഇന്ദ്രജിത് സുകുമാരന്‍) യും ഭാര്യ ചെറിലും (മലയാളം പതിപ്പിലെ നടിയുടെ പേരറിയില്ല.) കസിന്‍ മര്‍വിനും (ജഗതി ശ്രീകുമാര്‍ - അതേ സോഡാ ഗ്ലാസ് കണ്ണടയും ഭാവങ്ങളുമായി!) എന്നിവരാണ് ഈ അക്രമത്തിനു പിന്നില്‍. പണം കൊടുത്തില്ലെങ്കില്‍ 24 മണിക്കൂറിനുള്ളീല്‍ കുട്ടിയെ കൊല്ലും. എന്നാല്‍ ഇടയ്ക്കിടെ മരുന്നു വേണ്ട മാരകമായ ഒരു തരം ശ്വാസകോശ രോഗത്തിനടിമയാണാ കുഞ്ഞ് എന്ന് അവര്‍ അറിയുന്നതുമില്ല. ജോ ഹിക്കിയും ചെറിലും മര്‍വിനും പണത്തിനു വേണ്ടി മാത്രമാണോ ഇതൊക്കെ ചെയ്യുന്നത്? കുട്ടിയെ വീണ്ടെടുക്കാന്‍ വില്ലിനും കാരനും കഴിയുമോ?
ഗ്രെഗ് ഐല്‍‌സ് എഴുതിയ ‘24 അവേഴ്സ് ‘എന്ന നോവലിനെ ആധാരമാക്കി 2002ല്‍ ലൂയിസ് മന്‍ഡോക്കി സംവിധാനം ചെയ്ത ഹോളിവുഡ് ചിത്രമാണ് ട്രാപ്പ്ഡ് (അഥവാ 2011ല്‍ പുറത്തിറങ്ങിയ റേസ്...... ഓടിത്തള്ളിക്കോ!)
ഒറിജിനലിനെ മികച്ചതാക്കുന്ന ചടുലങ്ങളായ ചേസ് സീനുകളും വിമാനവും ഹെലികോപ്റ്ററുമൊന്നും മലയാളം പതിപ്പില്‍ ഇല്ല. ഡോക്ടറുടെ ഭാര്യയായി വരുന്ന ചര്‍ലിസ് തെറോണെപ്പോലെ ജട്ടിയിട്ട് അഭിനയിക്കേണ്ട ഗതികേട് മംതയ്ക്ക് ഉണ്ടാകുന്നുമില്ല.
ട്രാപ്ഡ് ന്റെ ട്രെയിലര്‍ ഇവിടെ കാണാം...

അടവി

2011-03-12T00:52:00.000+05:30

പന്തളം കുരമ്പാല പുത്തന്‍‌കാവ് ഭഗവതി ക്ഷേത്രത്തിലെ
നരബലിക്കു പകരമെന്നു കരുതപ്പെടുന്ന ചൂരല്‍ ഉരിളിച്ചയാണ് അടവി.
അഞ്ചു കൊല്ലത്തിലൊരിക്കലാണ് ഈ ആചാരം ക്ഷേത്രമുറ്റത്ത് അരങ്ങേറുന്നത്.
രാത്രി പന്ത്രണ്ടുമണിക്ക് ആരംഭിച്ച് വെളുക്കോളം നീളുന്ന ഈ പരിപാടിയില്‍
വൃതാനുഷ്ഠാനങ്ങളോടെ എത്തുന്ന യുവാക്കള്‍ മേലാസകലം
കൂര്‍ത്ത മുള്ളുകളുള്ള പച്ചച്ചൂരല്‍ ചുറ്റിവരിഞ്ഞ് നിലത്തുരുളുന്നു.
ചില ചിത്രങ്ങള്‍ ഇതാ..

താളമേളക്കാര്‍


ചൂരല്‍ ദേഹത്ത് ചുറ്റുന്നു


പ്രായം കുറഞ്ഞവരെ അധികം ചുറ്റിക്കാതെ വിടും.


ചൂരല്‍ ചുറ്റി നിലത്തുരുളുന്നു


ചൂരല്‍ ചുറ്റിവരിഞ്ഞ ആളെ എടുത്തുകൊണ്ടു പോകുന്നു.


ചൂരല്‍ ചുറ്റ് അഴിച്ചു വിടുന്നു.

ഊഴം കാത്തു നില്‍ക്കുന്ന നേര്‍ച്ചക്കാര്‍

പ്ലേ സ്കൂളിലെ ഉറക്കം.

2011-03-10T20:59:00.000+05:30

.

ഇളയ മകളെ പ്ലേസ്കൂളില്‍ നിന്നും വിളിക്കാന്‍ ചെന്നപ്പോള്‍
അവളുടെ മുഖത്ത് പതിവില്ലാത്ത ഒരു ചിരി.
ചോദിച്ചപ്പോള്‍ പറഞ്ഞു:
“ഇന്നു ഞാന്‍ അടി കിട്ടാതെ തന്നെ ഉറങ്ങിപ്പോയി”!
.

റേസ് = ഓടിത്തള്ളിക്കോ !

2011-03-06T00:45:00.000+05:30

ലേലു അല്ലൂ അഴിച്ചു വിട് എന്നു പറഞ്ഞുകൊണ്ടിരുന്നപ്പോഴുണ്ട് പടം തീരുന്നു.
തിയേറ്ററാകെ കുറുക്കന്മാരുടെ സംസ്ഥാന സമ്മേളനത്തിലെന്നപോലെ
നീണ്ട ഓരി.
റേസ്(അതുതന്നെയാണോ ഈ പടത്തിന്റെ പേര്‍ എന്ന് ഒന്നുകൂടി പോസ്റ്ററിലേക്കുനോക്കാന്‍പോലും ധൈര്യം വരാതെ വീട്ടിലേക്കുള്ള വഴി വണ്ടി വിട്ടു.) !
അബദ്ധമാണ് പറ്റിയതെന്ന് തുടക്കം കണ്ടപ്പോഴേ മനസ്സിലായി. ഒരു ഡോക്ടറുടെ മകളെ തട്ടിക്കൊണ്ടു പോകുന്നു.
ആദ്യം ഒരു കോടിചോദിക്കുന്നു. പിന്നെ രണ്ട് ലോഡ് (സോറി) രണ്ടു കോടി ചോദിക്കുന്നു. ചെന്നയിലെ വഴിയോരക്കച്ചവടക്കാരായിരുന്നെങ്കില്‍ അടിച്ചു കവാലം പൊട്ടിച്ചേനേ!
ആദ്യപകുതി ഐസിട്ടമീന്‍ പോലിരുന്നപ്പോ കരുതി രണ്ടാം പാതി ചൂടാകുമെന്ന്. എവിടെ!
മകളുടെ ഓപ്പറേഷന്‍ നടത്താന്‍ കാശില്ലാതിരുന്ന ഇന്ദ്രജിത്തിന്റെ പ്രതികാരമായിരുന്നു ഈ തോക്കും കാറും പെണ്ണുമെല്ലാമെന്നറിയുന്നതോടൊപ്പം ഈ ഇന്ദ്രജിത്ത് തന്നെ സത്യത്തില്‍ ഭ്രമരത്തിലെ മോഹന്‍ലാലായിരുന്നുവെന്നും നമ്മളറിയുന്നു. പോരാത്തതിന് ഇത് സാമൂഹ്യപ്രതിബദ്ധതയുള്ള ഒരു സിനിമയായിരുന്നെന്നും നാം മനസ്സിലാക്കുന്നു.
സ്ക്രീനിനെ മൂന്നായി പകുത്ത് ഒരു ഭാഗത്ത് നായകന്‍, മറുഭാഗത്ത് വില്ലന്‍, പിന്നൊന്നില്‍ ഓടുന്ന വാഹനം ... ഇങ്ങനെയൊക്കെയുള്ള വിഷ്യല്‍ ഇഫക്ട്സ് , ഷ്.. ഷ്... എന്ന സൌണ്ട് ഇഫക്‍റ്റ് എന്നിവയെല്ലാം ഈ സിനിമയുടെയും പ്രത്യേകതയാണ്.
എന്നാലും കുഞ്ചാക്കോ ബോബനും മംതയും ഈ കൊലച്ചതി ചെയ്യണ്ടായിരുന്നു. ( ഹരീന്ദ്രന്‍ ഒരു നിഷ്കളങ്കന്‍ എന്ന തനയന്‍ ചിത്രം കണ്ടന്നുമുതല്‍ ഇന്ദ്രജിത്തിനോടുള്ള വിശ്വാസം പോയിരുന്നു.) ഇങ്ങനെയൊക്കെയുള്ള കൂതറപ്പടങ്ങളില്‍ ഇനിയെങ്കിലും നിങ്ങള്‍ ഓസിന് അഭിനയിക്കരുത്.
ഈ സിനിമ നല്‍കുന്ന ഏക ആശ്വാസം ഇത് ഒന്നേമുക്കാല്‍ മണിക്കൂറു കൊണ്ട് അവസാനിക്കും എന്നുള്ളതാണ്.
കൊച്ചി ബേസാക്കിയുള്ള പടത്തിനൊന്നും പോകല്ലേ പോകല്ലേ എന്നൊരു സുഹൃത്ത് പലവട്ടം പറഞ്ഞതാണ്.
എനിക്കിതു തന്നെ വരണം.

ഉയരങ്ങള്‍

2011-02-27T05:53:00.000+05:30

.
"വലിയ മനുഷ്യരുടെ ഔന്നിത്യം
ഒറ്റയടിക്കുണ്ടായവയല്ല,
രാത്രിയില്‍ കൂടെയുള്ളവര്‍ ഉറങ്ങുമ്പോഴും
ഉയരങ്ങളിലേക്ക് അവര്‍ പടവുകള്‍ പണിയുകയായിരുന്നു."
-H.W.ലോങ്ഫെലോ.
.

ബാല്‍ത്തൂസിന്റെ പൂച്ചയും പെണ്ണുങ്ങളും

2011-02-18T00:01:00.000+05:30

മരിയോ വര്‍ഗാസ് ലോസയുടെ
‘ദ നോട്ട്‌ബുക്സ് ഒഫ് ഡോണ്‍ റിഗൊബെര്‍ത്തോ’ വായിച്ചപ്പോഴാണ്
ബാല്‍ത്തൂസിന്റെ ‘ദിവാസ്വപ്നക്കാരി’ എന്ന ചിത്രത്തെപ്പറ്റി അറിഞ്ഞത്.
അതൊന്നു കാണണമല്ലോ
എന്നു തോന്നിയപ്പോള്‍ ഗൂഗിളില്‍ കയറി.
balthus നായി തിരഞ്ഞു.

കിട്ടിയത് ഇതുപോലുള്ള ഒരുപറ്റം പൂച്ചക്കളേയും
കുഞ്ഞുദിവാസ്വപ്നക്കാരികളേയുമായിരുന്നു!
.
വിവാദ പോളിഷ് - ഫ്രഞ്ച് ചിത്രകാരനായി അറിയപ്പെടുന്ന
ബാല്‍ത്താസര്‍ ക്ലോസ്സോവ്സ്കി ഡി റോള അഥവാ ബാല്‍ത്തൂസ്
1908 ഫെബ്രുവരി 29ന് പാരീസില്‍ ജനിച്ചു.

.
തന്റെ കരിയറിലുടനീളം കലയുടെ സ്ഥിരം വഴികളില്‍ നിന്നും
വേറിട്ടു നടക്കുവാ‍നാണ് അദ്ദേഹം ശ്രമിച്ചത്.
പ്രദര്‍ശനങ്ങള്‍ നടക്കുമ്പോള്‍ തന്റെ ബയോഡാറ്റ നല്‍കുവാന്‍
പോലും ബാല്‍ത്തൂസിന് വലിയ മടിയായിരുന്നു.
“ഇത് ബാല്‍ത്തുസിന്റെ ചിത്രങ്ങള്‍;
ചിത്രകാരനെപ്പറ്റിയുള്ള വിവരങ്ങള്‍ ലഭ്യമല്ല;
നമുക്കു ചിത്രങ്ങള്‍ കാണാം” - ഇതായിരുന്നു കലാകാരനെപ്പറ്റി
ആകെയുണ്ടാകാറുള്ള വിവരണം.
ക്ലാസ്സിക്കല്‍ രീതിയില്‍ ചിത്രങ്ങള്‍ വരച്ചിരുന്ന
ബാല്‍ത്തുസിന്റെ രചനകളില്‍ മനുഷ്യരൂപങ്ങള്‍ക്കാണ്
പ്രാധാന്യം.

2001 ഫെബ്രുവരി 18ന് സ്വിറ്റ്സര്‍ലന്റില്‍ വച്ചായിരുന്നു മരണം.

.
ബാല്‍ത്തൂസിന്റെ കൂടുതല്‍ ചിത്രങ്ങള്‍ ഇവിടെ കാണാം
http://www.tendreams.org/balthus.htm
.
ബാല്‍ത്തൂസിനെപ്പറ്റി കൂടുതല്‍ വായിക്കാന്‍
http://en.wikipedia.org/wiki/Balthus

ഒരു അടിപൊളി വരസൂത്രം!

2011-02-12T22:49:00.000+05:30

ദാ, ഒരു ഓണ്‍ ലൈന്‍ ഡ്രോയിങ് ടൂള്‍.
ഹാര്‍മണി എന്നു പേരുള്ള ഈ വരസൂത്രം കൊണ്ട്
രസകരമാ‍യ ചിത്രങ്ങള്‍ വളരെ എളുപ്പം വരച്ചെടുക്കാം.
ഇതുകൊണ്ടു വരച്ച ചില ചിത്രങ്ങളിതാ...

ട്രാഫിക്

2011-02-11T22:37:00.000+05:30

.
‘ട്രാഫിക്’ എന്ന സിനിമ ഇപ്പോഴാണ് അടൂരെ തീയേറ്ററില്‍ എത്തുന്നത്.
ആഴ്ചകള്‍ക്കു മുമ്പു തന്നെ ഇതേപ്പറ്റി ടെലിവിഷനില്‍ പരിപാടികള്‍ കണ്ടിരുന്നു.
രാജേഷ് പിള്ളയേയും സംഘത്തേയും പറ്റി ഏകദേശ ധാരണയുമായിത്തന്നെയാണ്
പടം കാണാനിരുന്നത്.

തുടക്കത്തില്‍ കേരള കഫേയുടെ ഒരു മണമടിച്ചെങ്കിലും തിര്‍ന്നപ്പോള്‍
തീര്‍ത്തും തൃപ്തിയായി.

‘റണ്‍ ലോല റണ്‍’ എന്നൊരു ജര്‍മന്‍ സിനിമയുണ്ട്.
(ബീമാ പള്ളിയില്‍ വ്യാജ ഡി.വി.ഡി. കിട്ടും.)
ഒരേ കഥ മൂന്നു രീതിയില്‍ അതില്‍ കാണിക്കുന്നുണ്ട്.
നിമിഷങ്ങളുടെ വ്യത്യാസം കഥാഗതിയെ എങ്ങനെയൊക്കെ
മാറ്റിമറിക്കാമെന്ന് അത് നമ്മെ അത്ഭുതപ്പെടുത്തും.
ഒരേ കഥാപാത്രങ്ങള്‍, ഒരേ രംഗങ്ങള്‍... പക്ഷേ..
ഒരു നിമിഷത്തിനപ്പുറം ... എന്തൊരന്തരം!
റണ്‍ ലോല കാണുമ്പോഴൊക്കെ മനസ്സില്‍ തോന്നാറുള്ളത്
ഇതുപോലെ വേഗമുള്ള ഒരു സിനിമ മലയാളത്തിലെന്നുവരുമെന്നായിരുന്നു.
ട്രാഫിക് ആ വിഷമം മാറ്റിത്തന്നു.
തുടക്കം മുതല്‍ ഒടുക്കം വരെ പിടിച്ചിരുത്തുന്ന ചടുലത!

ചിത്രത്തില്‍ ഏറ്റവും ഇഷടപ്പെട്ടത് രമ്യാ നമ്പീശനെയായിരുന്നു.
ആദ്യമായാണ് രമ്യയെ ഭംഗിയുള്ള ഒരു വേഷത്തില്‍ കാണുന്നത്.
ഏറ്റവും ബോറ് സന്ധ്യ, വിനീത് ശ്രീനിവാസന്റെ ചെവിയില്‍ കടിക്കുന്ന രംഗവും.

കഥാപാത്രങ്ങളും പങ്കെടുത്തവരും നന്നായി.
.
ക്ലബ് എഫ് എമ്മിന്റെ പ്രതിബദ്ധത, പാര്‍ട്ടി നേതാവിന്റെ കൈക്കൂലി വാങ്ങല്‍ എന്നിങ്ങനെ
മാതൃഭൂമി ടച്ചുള്ള ചില ദൃശ്യങ്ങളുമുണ്ട് സിനിമയില്‍.

പടം വിട്ട് പുറത്തിറങ്ങിയ ചില ചെറുപ്പക്കാര്‍ ബൈക്ക് വല്ലാതെ
റേസ് ചെയ്ത് വാണം വിട്ട പോലെ പായുന്നതു കണ്ടു.

എന്നാലും, സിനിമയിലെ രണ്ട് ആക്സിഡന്റ് രംഗങ്ങള്‍ എങ്ങനെയാണ്
ചിത്രീകരിച്ചതെന്ന് ഇപ്പോഴും മനസ്സിലാകുന്നില്ല.
ഗ്രാഫിക് ഇഫക്ട് ആയിരിക്കുമോ?
.

ട്രെയിനും പെണ്‍കുട്ടിയും

2011-02-07T11:47:00.002+05:30

ആതിര എന്ന പെണ്‍കുട്ടി ഉണ്ടാക്കിയ ഒരു കൊളാഷ് ചിത്രം.
ട്രെയിനില്‍ നിന്നും വീണ പെണ്‍കുട്ടിയുടെ ദാരുണമായ അന്ത്യത്തെക്കുറിച്ചുള്ള വാര്‍ത്ത വായിച്ചു പത്രം മടക്കിവയ്ക്കവെയാണ് ഒരാഴ്ചയായി മേശമേല്‍ മറഞ്ഞു കിടന്ന ഈ ചിത്രം കണ്ണില്‍ പെട്ടത്.

വരവേല്‍‌പ്പ് (സ്വാഗത്) - ഒരു ഹിന്ദി ലഘു നാടകം

2011-02-06T23:55:00.000+05:30

ചായ വന്ന വഴി!

2011-01-23T23:22:00.000+05:30

കൊളസ്ട്രോള്‍ ഭീഷണി കാരണം കുറച്ചുനാളായി
ഗ്രീന്‍ ടീ എന്ന കയ്പുനീരാണു കുടിക്കുന്നത്.
അങ്ങനെയിരിക്കെ ഒരു വൈകുന്നേരം
പാലും പഞ്ചസാരയും ചേര്‍ത്ത ഒരു ചായ കുടിക്കണമെന്ന് കലശലായ ആഗ്രഹം തോന്നി.
അമ്മയോട് ഒരു ചായ ഇട്ടുതരാനായി ഇത്തിരി കടുപ്പത്തില്‍ തന്നെ പറഞ്ഞു.
എന്നാല്‍ അമ്മയാവട്ടെ പതിവു തെറ്റിക്കാതെ ഒരു കടു കട്ടന്‍ തന്നെ മധുരമില്ലാതെ
കൊണ്ടുവന്നു തരികയും ചെയ്തു.
ആറുമണി കഴിഞ്ഞതോടെ ഭാര്യയെത്തി.
ബാറ്റണ്‍ കയ് മാറി വീടിനു പുറത്തിറങ്ങി.
ബാഡ്‌മിന്റന്‍ കോര്‍ട്ടിലെത്തി.
ദീപക്കിനോടൊപ്പം വല കെട്ടിക്കൊണ്ടിരുന്നപ്പോഴാണ് ആ ഫോണ്‍ വന്നത്.
മധുവാണ്.
സെക്കന്റ് ഷിഫ്റ്റിലെ കുട്ടികളുമായി പോയ വാഹനം അപകടത്തില്‍ പെട്ടിരിക്കുന്നത്രെ.
വേഗം സ്കൂട്ടറെടുത്തു.
ഒരുപാടുപേര്‍ കവലയിലേക്ക് ഓടിക്കൂടി.
“തെങ്ങുംതാരയ്ക്കടുത്ത് വണ്ടി നിയന്ത്രണം വിട്ട് പാഞ്ഞ്
ഒരു ഇലക്ട്രിക് പോസ്റ്റിലിടിച്ച് കരണം മറിഞ്ഞിരിക്കുന്നു.“
നമ്മുടെ കുഞ്ഞുങ്ങള്‍...
നെഞ്ച് പടപടാ ഇടിച്ചു.
മനസ്സ് നിലവിളിച്ചു.
മധുവിനെയും പുറകില്‍ കയറ്റി കായം കുളം ഭാഗത്തേക്ക്
ആവുന്നത്ര വേഗത്തില്‍ സ്കൂട്ടറോടിച്ചു.
എതിരേ ചീറിവരുന്ന ആമ്പുലന്‍സുകളും പോലീസ് ജീപ്പുകളും.
“ഒരുകുട്ടിയുടെ തലയറ്റു പോയിരിക്കുന്നു.“
“എത്രപേര്‍ മരിച്ചെന്ന് ഒരറിവുമില്ല” .
കണ്ണിലിരുട്ടു കയറുമ്പോലെ.
മധുവിനു സ്കൂട്ടറോടിക്കാമോ? ഞാന്‍ ചോദിച്ചു.
മധുവിനു ധൈര്യം പോര.
വണ്ടി ഓരത്തൊതുക്കി ഞാന്‍ നിലത്തിരുന്നു.
വീണ്ടും സ്റ്റാര്‍ട്ടു ചെയ്ത് അല്പം കൂടി മുന്നോട്ട്.
ഇല്ല. കഴിയുന്നില്ല. കൈകാലുകള്‍ കുഴയുന്നു.
എന്തൊരു നാണക്കേട്.
മധു എന്നെ താങ്ങിപ്പിടിച്ച് റോഡ് മുറിച്ചുകടന്ന്
ഒരു തട്ടുകടയുടെ ബഞ്ചില്‍ ഇരുത്തി.
അവര്‍ ഒരു കുപ്പിയില്‍ തണുത്ത വെള്ളം കൊണ്ടുവന്നു തന്നു.
രണ്ടു ചായ ഓര്‍ഡര്‍ ചെയ്യപ്പെട്ടു.
അപ്പോഴേക്കും കാറുകളിലും ബൈക്കുകളിലുമായി
സുഹൃത്തുക്കള്‍ അവിടം കടന്നു പോയിരുന്നു.
മധു ശശിയുടെ സ്കൂട്ടറിന്റെ പിന്നില്‍ കയറിപ്പോയി.
എന്റെ മുന്നിലായി രണ്ടു ഗ്ലാസ് ചായ എത്തി.
പാലൊഴിച്ച മധുരമുള്ള ചായ!

പരീക്ഷക്കാലത്തെ വര!

2011-01-19T19:46:00.000+05:30

അക്ഷയ് തന്റെ ഡ്രോയിങ് ബുക്കില്‍ കോറിയിട്ട ചില കാര്‍ട്ടൂണുകളാണിവ.
പുതിയ പാഠ്യപദ്ധതിയിലെ ആദ്യ പരീക്ഷ നേരിടുന്ന ഒരു പത്താം ക്ലാസ്സുകാരന്റെ
ആകുലതകളാണ് ചിത്രങ്ങളില്‍.

നിത്യകല്യാണി അഥവാ ശവംനാറി.

2011-01-14T20:03:00.003+05:30

.
ഒരു പൂവ്.
രണ്ടു പേര്.
രണ്ടും തമ്മില്‍ എന്തൊരു വൈരുധ്യം!
മൂന്നു പതിറ്റാണ്ടുകള്‍ക്കു മുന്‍പ് ഒരു ചെറിയ കുട്ടിയായി,
ആബുലന്‍സില്‍ മുത്തശ്ശിയുടെ ശവവുമായി,
പത്തനംതിട്ടയിലെ വള്ളിക്കോടു കോട്ടയത്തെ കുടുംബത്തു ചെന്നപ്പോഴാണ്,
തൊടിയില്‍ പൂത്തുനിന്ന ഈ ചെടിയെ ആദ്യമായി ശ്രദ്ധിക്കുന്നത്.
പിന്നെ വര്‍ഷങ്ങള്‍ക്കുശേഷം ഭാര്യയോടൊത്ത് തിരുവനന്തപുരത്തെ
മ്യൂസിയം ഉദ്യാനത്തില്‍ ഓരോതവണ ഉലാത്തുമ്പോഴും കണ്ടു
ഒരു പാട് നിത്യകല്യാണിച്ചെടികള്‍..
വെളുത്തും തുടുത്തും വയലറ്റു നിറത്തിലും.
.

രൂപേഷ് പോളിന്റെ ‘മഴവില്ലേറ്റുമരിച്ച കുട്ടികള്‍‘

2011-01-07T17:53:00.000+05:30

ലാപ് ടോപ്പ് എന്ന സിനിമ സംവിധാനം ചെയ്ത
രൂപേഷ് പോള്‍ തന്നെയാണോ ഈ കവിതയെഴുതിയതെന്നറിയില്ല.
പതിനൊന്നു വര്‍ഷം മുമ്പ് മാതൃഭൂമിയില്‍ വന്നതാണിത്.
അന്ന് വരയ്ക്കാനായി ഞാന്‍ തിരഞ്ഞെടുത്ത വിഷയങ്ങളുമായി
അത്ഭുതപ്പെടുത്തുമാറ് സാദൃശ്യമുണ്ടായിരുന്നു ഈ വരികള്‍ക്ക്..
.

വീറ്റാസും കരയുന്ന കൊക്കും

2011-01-02T11:45:00.002+05:30

വിറ്റാലിയ് വിറ്റലിക് വ്ലഡാസോവിച് ഗ്രച്യോവ് എന്ന റഷ്യന്‍ ഗായകന്‍ ‘വീറ്റാസ്’ എന്നാണറിയപ്പെടുന്നത്. വീറ്റാസിന്റെ ഓപ്പെറ നമ്പര്‍ 2 എന്ന 2001ലെ ഗാനം ഇപ്പോഴും ഇന്റര്‍നെറ്റിലൂടെ ഫോര്‍വേഡ് ചെയ്യപ്പെടുന്നു. ഉച്ചസ്ഥായിയിലുള്ള ആലാപനമാണ് വീറ്റാസിന്റെ ഗാനങ്ങളെ ശ്രദ്ധേയമാക്കുന്നത്. അതുകൊണ്ടുതന്നെ ‘ഡോള്‍ഫിന്‍ വോയിസ് പ്രിന്‍സ്‘ എന്ന വിളിപ്പേരും ഇദ്ദേഹത്തിനു കിട്ടിയിട്ടുണ്ട്.
.
ടെക്ക്നോയാണോ, ഡാന്‍സ് ആണോ, ക്ലാസ്സിക്കലാണോ, ജാസ്സാണോ അതോ നാടോടി ഗാനമാണോ എന്നൊന്നും തിരിച്ചറിയാനാവാത്ത ഒരു തരം ഇലക്ട്രിക് പോപ്പ് ഗാനരീതിയാണ് വീറ്റാസിന്റേത്.
സ്വന്തം ഗാനങ്ങളുടെ ചിത്രീകരണങ്ങളില്‍ അഭിനയിക്കുന്നതോടൊപ്പം വീറ്റാസ് സ്വന്തമായി വസ്ത്രങ്ങള്‍ ഡിസൈന്‍ ചെയ്യുകയും ചെയ്യുന്നു. ‘ദിവ‘ എന്ന ബാന്റാണ് വീറ്റാസിന് കച്ചേരികളില്‍ പിന്‍‌തുണ നല്‍കുന്നത്.
.
.

വീറ്റാസിന്റെ	"Crane's Cry" എന്ന ഗാനം

ആദ്യരാത്രിയില്‍ പൂച്ചയെ കൊല്ലണം. (പിന്നെ കൊന്നിട്ടു കാര്യമില്ല!)

2011-01-01T00:01:00.017+05:30

(സശ്മല്‍ എന്ന ബംഗാളി സുഹൃത്ത് പറഞ്ഞ കഥ.)

ഒന്നാമന്‍ ആകെ വിഷമത്തിലായിരുന്നു.
രണ്ടാമന്‍ കാര്യം തിരക്കി.
ഒന്നാമന്‍ പറഞ്ഞു:
“എന്റെ ഭാര്യയ്ക്ക് എന്നോട് തീരെ ബഹുമാനമില്ല.“
അപ്പോള്‍ രണ്ടാമന്‍ ഇപ്രകാരം പറഞ്ഞു:
“ആദ്യരാത്രിയില്‍ പൂച്ചയെ കൊല്ലണം. പിന്നെ കൊന്നിട്ടു കാര്യമില്ല.”
“അതെന്താണ്? “ - ഒന്നാമന്‍ ചോദിച്ചു.
അതിനു മറുപടിയായി രണ്ടാമന്‍ ഒരു കഥയാണു പറഞ്ഞത്.
അത് ഇങ്ങനെയായിരുന്നു:
.

രണ്ടാമന്റെ കല്യാണദിവസം.

കല്യാണമൊക്കെ പൊടിപൊടിച്ചു.

രാത്രിയായി.

ആദ്യരാത്രി.

രണ്ടാമനും നവവധുവും വധുവിന്റെ വീട്ടിലാണ്.

ഇരുവര്‍ക്കുമായി അത്താഴം വിളമ്പി.

നല്ല മീന്‍‌കറിയും മറ്റുവിഭവങ്ങളുമായി ഒന്നാന്തരം സദ്യ.

മീന്‍‌കറിയുടെ മണമടിച്ചാവണം ഒരു പൂച്ച കുറുകിക്കൊണ്ട്

അവിടെയൊക്കെ കറങ്ങിനടക്കാന്‍ തുടങ്ങി.

രണ്ടാമന് പൂച്ചയുടെ മട്ടും ഭാവവുമൊന്നും തീരെപ്പിടിച്ചില്ല.

കഷ്ടകാലത്തിന് പൂച്ചയ്ക്ക് ഇയാളുടെ മനസ്സിലിരിപ്പ് മനസ്സിലായതുമില്ല.

പൂച്ച കൊതി സഹിക്കാതെ രണ്ടാമന്റെ അടുത്തേക്കു ചെന്നു.

മീന്‍പാത്രത്തിലേക്കു നോക്കി ‘മ്യാവൂ’ എന്നോമറ്റോ പറഞ്ഞു.

രണ്ടാമന്‍ തന്റെ ഇടതു കൈ ഓങ്ങി.

ഒറ്റയടി!

പൂച്ച മയ്യത്ത്!

വധുവും ബന്ധുക്കളും ഞെട്ടിപ്പോയി.

വധുവിന്റെ അമ്മ മകളെ ഉടന്‍‌തന്നെ അടുക്കളയിലേക്കു വിളിച്ചു.

എന്നിട്ട് ഭയം കൊണ്ട് കണ്ണും മുഴപ്പിച്ച് കുശുകുശാന്ന് ഇങ്ങനെ പറഞ്ഞു:

“മോളേ, സൂക്ഷിച്ചോണം. ആളു ഭയങ്കരനാ. തഞ്ചത്തിനു നിന്നാല്‍

നിനക്കു കൊള്ളാം.”

.
“എന്തായാലും അന്നു മുതല്‍ എന്റെ ഭാര്യയ്ക്ക് എന്നോടു ഭയങ്കര ബഹുമാനമാ”.
- രണ്ടാമന്‍ കഥയവസാനിപ്പിച്ചിട്ട് പറഞ്ഞു.
.
ഒന്നാമനു കഥ വളരെ ഇഷ്ടപ്പെട്ടു.
രണ്ടാമനു കൈ കൊടുത്തിട്ട് അയാള്‍ വീട്ടിലോട്ടു പോയി.
ഏതു വീട്ടിലോട്ട്?
ഭാര്യവീട്ടിലോട്ട്.
ഭാര്യയും അളിയന്മാരും അമ്മായിയമ്മയും അമ്മായിയച്ഛനുംമെല്ലാം
പുച്ഛത്തോടെ തന്നെ നോക്കുന്നത് കണ്‍കോണിലൂടെ ഒന്നാമന്‍ കണ്ടു.
രാത്രിയായി.
അത്താഴം വിളമ്പി.
കഴിക്കാനിരുന്നപ്പോ, ദാ വരുന്നു പൂച്ച.
എല്ലാം എളുപ്പമായല്ലോ - അയാള്‍ മനസ്സിലോര്‍ത്തു.
പൂച്ച അടുത്തെത്തിയതും രണ്ടാമനെപ്പോലെ ഒന്നാമനും
ഇടം കൈ വീശി ആഞ്ഞൊരടി.
ഈ പൂച്ചേം മയ്യത്ത്!
.
“ മഹാപാപീ.. ആറ്റു നോറ്റു വളത്തിയ ഞങ്ങടെ ഓമനപ്പൂച്ചയെ നീ...”
.
അമ്മായിയമ്മയുടെ ഉച്ചത്തിലുള്ള ഈ നിലവിളിക്കുശേഷം ഒന്നാമന്‍
മൂന്നു ദിവസത്തേക്ക് ഒന്നും കേട്ടില്ല.
.

മൂന്നു ദിവസങ്ങള്‍ക്കു ശേഷം ബോധം വന്നപ്പോള്‍
തലയിലേയും കയ്യിലേയും വെച്ചുകെട്ടുകളുമായി
ഒന്നാമന്‍ ഞൊണ്ടി ഞൊണ്ടി രണ്ടാമനെ കാണാന്‍ ചെന്നു.
എന്നിട്ടു പറഞ്ഞു.:
“ആ പൂച്ചപ്പരിപാടി ചീറ്റിപ്പോയല്ലോ ചങ്ങായീ...“
.
അപ്പോള്‍ രണ്ടാമന്‍ ഇങ്ങനെ മറുപടി പറഞ്ഞു:
“ഞാനപ്പഴേ പറഞ്ഞതല്ലേ,
ആദ്യരാത്രിയില്‍ പൂച്ചയെ കൊല്ലണം. പിന്നെ കൊന്നിട്ടു കാര്യമില്ല!“

മത്തീസ്

2010-12-31T20:02:00.001+05:30

ഇന്ന് (ഡിസംബര്‍ 31)
ലോകപ്രശസ്ത ഫ്രഞ്ച് എക്സ്പ്രഷനിസ്റ്റ് /ഫേവിസ്റ്റ്
(ചിത്രകാരന്‍) ഹെന്‍‌റി മത്തീസിന്റെ (1869) ജന്മദിനം.

മത്തീസിന്റെ ‘നൃത്തം‘.

പുരുഷ മോഡല്‍.

ഹാര്‍മണി ഇന്‍ റെഡ്.

ടോപ് ടെണ്‍ - 2010

2010-12-31T16:19:00.000+05:30

‘കുത്തിവര’യില്‍ ഇക്കൊല്ലം കൂടുതല്‍ പേര്‍ കണ്ട പോസ്റ്റുകള്‍

പന്നപ്പട്ടികള്‍

Jul 25, 2010

കുട്ടിക്കണ്ണിലെ കല്യാണം

Aug 19, 2010

നഗ്നചിത്രങ്ങള്‍

Nov 23, 2010

അന്‍‌വര്‍

Oct 21, 2010

ഹിന്ദുച്ചായയും മുസ്ലീം കബാബും.

Nov 3, 2010

ചെങ്ങറ - പട്ടയവും പത്രങ്ങളും

Aug 4, 2010

അപൂര്‍വരാഗം

Aug 15, 2010

മനാലിയിലെ മലയാളികള്‍

Aug 27, 2010

നക്ഷത്രങ്ങള്‍ കഥ പറയുമ്പോള്‍

Aug 8, 2010

10.

മച്ഛലി ചിക്കന്‍ വാല

Aug 24, 2010

കുളി

2010-12-29T05:32:00.001+05:30

ഇന്ന് ഡിസംബര്‍ 29.
ഫ്രഞ്ച് റൊക്കോക്കോ ചിത്രകാരന്‍
ജീന്‍ ബാപ്റ്റിസ്റ്റ് പെയ്റ്ററുടെ (1696)
ജന്മദിനം.
.

പെയ്റ്ററുടെ കുളിക്കുന്ന പെണ്ണുങ്ങള്‍ എന്ന ചിത്രം.
.

വാലൊട്ടന്‍

2010-12-28T04:42:00.005+05:30

ഇന്ന് , ഡിസംബര്‍ 28.
സ്വിസ് ചിത്രകാരനും പ്രിന്റ് മേക്കറുമായ
ഫെലിക്സ് എഡ്വേഡ് വാലൊട്ടന്റെ (1865)
ജന്മദിനം.
ആധുനിക ‘വുഡ്കട്ട് ‘ പ്രിന്റ് മേക്കിങില്‍
അഗ്രഗണ്യനായിരുന്നു ഇദ്ദേഹം.
.

വാലൊട്ടന്റെ ഒരു വുഡ്കട്ട് പ്രിന്റ്.
.
.

വാലൊട്ടന്റെ ഒരു പെയിന്റിങ്.
.
.

വാലൊട്ടന്‍
.

ലിറോക്സ്

2010-12-27T05:19:00.001+05:30

ഇന്ന് ഡിസംബര്‍ 27.

ഫ്രഞ്ച് ചിത്രകാരന്‍ ലൂയിസ് ഹെക്ടര്‍ ലിറോക്സിന്റെ (1829)
ജന്മദിനം. യൂറോപ്പില്‍ അക്കാലത്ത് നിലനിന്നിരുന്ന
അക്കാദമിക് ശൈലിയിലായിരുന്നു ലിറോക്സിന്റെ രചന.
.

‘വിര്‍ജിലിന്റെ ശവകുടീരത്തില്‍’ -
ലിറോക്സിന്റെ ഒരു ചിത്രം.
.

ലിറോക്സ്.
.

റാഫേല്‍ സോയര്‍

2010-12-25T04:59:00.000+05:30

ഇന്ന്, ഡിസംബര്‍ 25.
റഷ്യയില്‍ ജനിച്ച
അമേരിക്കന്‍ ചിത്രകാരനും പ്രിന്റ് മേക്കറുമായ
റാഫേല്‍ സോയറുടെ (1899) ജന്മദിനം.
.

സോയറുടെ ‘ചെറുപ്പക്കാരിയായ മോഡല്‍‘ എന്ന പ്രിന്റ്.
.
.

മനുഷ്യന് ഒരു ആമുഖം

2010-12-24T15:30:00.003+05:30

.
“പൂര്‍ണ്ണവളര്‍ച്ചയെത്തും‌മുമ്പ് മരിച്ചു പോകുന്ന
ഒരേയൊരു ജീവിയാണ് മനുഷ്യന്‍!”.
.
വയസനായിത്തുടങ്ങിയെന്ന് ആദ്യമായി തോന്നിയ
അതേ ആഴ്ചതന്നെയാണ് തികച്ചും യാദൃശ്ചികമായി
സുഭാഷ് ചന്ദ്രന്റെ ‘ മനുഷ്യന് ഒരു ആമുഖം‘ എന്ന
ഈ പുസ്തകം കണ്ണില്‍ പെടുന്നത്.
തുടക്കം ഇങ്ങനെയും!..
.
“ധീരനും സ്വതന്ത്രനും സര്‍വോപരി സര്‍ഗാത്മകനുമായ
മനുഷ്യശിശു അറുപതോ എഴുപതോ വര്‍ഷംകൊണ്ട്
ഭീരുവും പരതന്ത്രനുമായിത്തീര്‍ന്ന് സ്വന്തം സൃഷ്ടിപരത
വംശവൃദ്ധിക്കുവേണ്ടിമാത്രം ചെലവിട്ട് ഒടുവില്‍
വൃദ്ധവേഷം കെട്ടിയ വലിയൊരു കുട്ടിയായി
മരിച്ചുപോകുന്നതിനെയാണ് മനുഷ്യ ജീവിതം എന്നു
പറയുന്നതെങ്കില്‍, പ്രിയപ്പെട്ടവളേ,
മനുഷ്യനായി പിറന്നതില്‍ എനിക്ക്
അഭിമാനിക്കാന്‍ ഒന്നുമില്ല.”
‌- ജിതേന്ദ്രന്‍ ആന്‍‌മേരിക്കയച്ച ഒരു കത്തില്‍നിന്ന്.
.
തച്ചനക്കര എന്ന ദേശത്തെപ്പറ്റി മറ്റൊരുദേശത്തിന്റെ
കഥ പറയാനാണൊരുക്കമെന്നായിരുന്നു
വായിച്ചു തുടങ്ങിയപ്പോള്‍ തോന്നിയത്.
മുപ്പതു കൊല്ലം മുമ്പ് ഒരു ഒന്‍പതുകാരന്‍ നിലത്തുവയ്ക്കാതെ
വായിച്ചുതീര്‍ത്ത അതിരാണിപ്പാടത്തിന്റെ കഥ നല്‍കിയ
അതേ ആവേശത്തോടെ താളുകള്‍ മറിഞ്ഞു.
.
എന്നാല്‍ നാടിന്റെയും നാട്ടുകാരുടെയും കഥകള്‍ക്കുമപ്പുറം
മനുഷ്യന്റെ ഒരു പൂര്‍ണ്ണ പരിശ്ചേതമാണ് കണ്ണില്‍ പെട്ടത്.
അര്‍ത്ഥരഹിതമായ കാമനകള്‍ക്കുവേണ്ടി ജീവിതമെന്ന
വ്യര്‍ത്ഥകാലത്തിലൂടെ സഞ്ചരിക്കുന്ന മനുഷ്യജന്മങ്ങളുടെ
ഒരു ആമുഖം.
ചിന്തിപ്പിക്കുന്ന ഒരു നോവല്‍.
വ്യത്യസ്ഥമായ രചനാരീതി.
എഴുപതുകളില്‍ ജനിച്ച ഏവരും വായിച്ചിരിക്കേണ്ട ഒരു
പുസ്തകം.
.
മനുഷ്യന് ഒരു ആമുഖം (നോവല്‍)
-സുഭാഷ് ചന്ദ്രന്‍
.
ഡി സി ബുക്സ്
372 പേജ്
വില : 195 രൂപ.
.

.

ജോസഫ് കോര്‍നെല്‍

2010-12-24T05:06:00.000+05:30

ഇന്ന് ഡിസംബര്‍ 24.

അമേരിക്കന്‍ ചിത്രകാരനും ശില്പിയും ചലച്ചിത്രകാരനുമായ
ജോസഫ് കോര്‍നെലിന്റെ (1903)
ജന്മദിനം.
കയ്യില്‍ കിട്ടുന്ന സാധനങ്ങള്‍ ഉപയോഗിച്ച്
ത്രിമാനമായി തയ്യാറാക്കുന്ന ചില ചിത്രങ്ങളായിരുന്നു
കോര്‍നെലിന്റെ സവിശേഷത.
.

കൊര്‍നെലിന്റെ ഒരു ‘അസംബ്ലേജ്’.
.

കോര്‍നെല്‍.
.
.

ആതിരപ്പള്ളി

2010-12-18T19:58:00.008+05:30

ഗംഗയെ ശിരസ്സാവഹിച്ച ശിവഭഗവാനോട്
അത്ഭുതാദരങ്ങള്‍ തോന്നിക്കുമാറ്
ഉച്ചത്തില്‍ പതിക്കുന്ന വെള്ളച്ചാട്ടം.
എത്ര മാറി നിന്നാലും നനയ്ക്കുന്ന തെറിച്ച ചാറ്റല്‍.
ചുറ്റും മരങ്ങളുടെ ഇളം പച്ചപ്പ്.
മകളെ തോളിലേറ്റിയായിരുന്നു അന്ന്
പടവുകള്‍ ഇറങ്ങിയത്.
.
വെള്ളച്ചാട്ടം കാണാന്‍ വീണ്ടും പോകുമ്പോള്‍
മഴയായിരുന്നു.
വഴിക്കുവെച്ച് വണ്ടിയുടെ ഒരു ടയറും പഞ്ചറായി.
സമയമെല്ലാം അങ്ങനെ പോയി.
കുട്ടികള്‍ പറഞ്ഞു:
ഞങ്ങള്‍ക്ക് സില്‍‌വര്‍ സ്റ്റോം കണ്ടാല്‍ മതി.
ശരി.
അവരെ പാര്‍ക്കിനുള്ളിലേക്കു കയറ്റിയിട്ട്
ഞങ്ങള്‍ പുറത്തിറങ്ങി.
വെള്ളച്ചാട്ടത്തിലേക്ക് ഇനിയും ദൂരമുണ്ട്.
പോയിവരാന്‍ സമയമില്ല.
ചാട്ടമൊക്കെക്കഴിഞ്ഞ്,
പുഴ പിന്നെയും ഒഴുകുന്ന കടവത്ത്
കാല്‍ നനയ്ക്കുകയെങ്കിലും ചെയ്യണം.
.

ചാലക്കുടിപ്പുഴ (ജലച്ചായം കൊണ്ടു വരച്ചത്)
.

പുഴക്കരയില്‍ ഫോട്ടോ സെഷനെത്തിയ നവവധു
.
.

തിരുവനന്തപുരം പുസ്തകമേള

2010-12-16T22:57:00.005+05:30

ഇളവെയിലില്‍

2010-12-12T15:44:00.000+05:30

എന്റെ ഫ്യൂജി കളര്‍ പേപ്പര്‍ പുസ്തകത്തിലെ ഫോളിയേജ് ഗ്രീന്‍ തീര്‍ക്കുമാറ്

മഞ്ഞനിറമായിരുന്നു ആ പ്രഭാതത്തിന്.

സ്വര്‍ണ്ണത്തിന് സുഗന്ധം എന്ന പോലെ ആയിരുന്നു,

ഇളവെയിലില്‍ തിളങ്ങുന്ന പൊന്തക്കാടുകള്‍ വരയ്ക്കാനിരുന്ന എന്റെ മുന്നിലേക്ക്

ഒരു കൂട്ടം മയിലുകള്‍ എത്തിയത്.
.

ഹാപ്പി ലാന്‍ഡില്‍ മഴയത്ത്

2010-12-12T08:57:00.013+05:30

മഴ തകര്‍ത്തു പെയ്യുന്നു.
ആകാശം ഇരുണ്ടു മൂടി.
കുടയെടുക്കാന്‍ മറന്നു.
കടയില്‍ തൊപ്പിയുണ്ട്.
വാങ്ങി തലയില്‍ വച്ചിട്ട്
ഒറ്റ ഓട്ടം വച്ചുകൊടുത്തു.
കുട്ടികള്‍ക്കാകട്ടെ സ്വര്‍ഗ്ഗം കിട്ടിയമാതിരിയായിരുന്നു!
ബാഗൊക്കെ ഒതുക്കിവച്ചിട്ട് അവര്‍ റൈഡുകള്‍ ലക്ഷ്യമാക്കി പാഞ്ഞു.
വായ്പ വാങ്ങിയ ഒരു കുടയുമായി രാജേന്ദ്രനും സ്വന്തമായി കുടയുണ്ടായിരുന്ന
അദ്ധ്യാപികമാരും പിന്നാലേ പാഞ്ഞു.
ഹാപ്പിലാന്‍ഡ്- തിരുവനന്തപുരം ജില്ലയില്‍ വെമ്പായത്തുള്ള
ഒരു വാട്ടര്‍ തീം പാര്‍ക്ക് -
പാര്‍ക്ക് ശരിക്കും വാട്ടര്‍ പാര്‍ക്കായത് ഇപ്പോഴാണ്.
വെള്ളം വെള്ളം സര്‍വ്വത്ര!
മഴ ഉടനേയൊന്നും മാറുന്ന ലക്ഷണമില്ല.
എന്തായാലും നനയാന്‍ വയ്യ.
മൂന്നു ഘട്ടങ്ങളായി ഓടി കാന്റീനിലെത്തി.
നമ്മുടെ പ്രിയപ്പെട്ട സ്ഥലം.
.
പക്ഷേ, ഇത്തവണ പണി വേറേയായിരുന്നു.
.
രാജേന്ദ്രന്‍ ഫോണിലൂടെ പറഞ്ഞു. “വരച്ചോ..
പിള്ളാരേ ഞങ്ങളു നോക്കിക്കോളാം.”
.
അങ്ങനെ,
ഉച്ചവരെ വര.
മഴ നിലയ്ക്കുന്നില്ല.
ഊണുകഴിഞ്ഞ് വീണ്ടും വര.
.
ചായ സമയമായപ്പോഴേക്കും കുട്ടികള്‍
നനഞ്ഞ ഉടുപ്പുകള്‍ മാറി.
അപ്പോഴേക്കും മഴയും മാറി!

ഊണിനു മുന്‍പ് വരച്ച ചിത്രം.
.

ഹാപ്പി ലാന്‍ഡിലെ കുളക്കരയില്‍ വീശിയെടുത്തത്

എഡ്‌വേഡ് മങ്‌ക്

2010-12-12T04:03:00.001+05:30

“എന്റെ ജീര്‍ണ്ണിച്ച ശരീരത്തില്‍ നിന്നും പൂക്കള്‍ വളരും,
അവയിലൂടെ ഞാന്‍ മരണത്തിനുമതീതനാകും.“ - എഡ്‌വേഡ് മങ്‌ക്.
.
ഇന്ന്, ഡിസംബര്‍ 12.
നോര്‍വീജിയന്‍ സിംബോളിസ്റ്റ് പെയിന്ററും പ്രിന്റ് മേക്കറുമായ
എഡ്‌വേഡ് മങ്‌ക് (1863) ന്റെ ജന്മദിനം.
എക്സ്പ്രഷനിസ്റ്റ് ചിത്രകലാ രീതിയുടെ മുന്‍ നിരയിലുണ്ടായിരുന്ന
കലാകാരനായിരുന്നു മങ്‌ക്.
.

.
മങ്‌കിന്റെ 'the scream' എന്ന ചിത്രം.
ഇത് -ജീവിതം, പ്രേമം, ഭയം, മരണം, വിഷാദം, ഉല്‍ഘണ്ഠ
‌എന്നീ വിഷയങ്ങളെ ആസ്പദമാക്കി രചിച്ച
The Frieze of Life എന്ന ചിത്രപരമ്പരയിലുള്ളതാണ്.

.

.
മങ്‌ക് 1894നും 95നും ഇടയ്ക്കായി വരച്ച അഞ്ചു ‘മഡോണ’
ചിത്രങ്ങളില്‍ ഒരെണ്ണം.
.
മങ് ‌കിന്റെ കൂടുതല്‍ ചിത്രങ്ങള്‍ക്കായി ഇവിടെ പോവുക.
.

അമ്പട ഞാനേ!

2010-12-09T22:15:00.000+05:30

ഹിന്ദു പത്രത്തില്‍ വന്ന ഒരു റിപ്പോര്‍ട്ട്.
.

ചിത്രീകരണത്തെപ്പറ്റി കുട്ടികളോട്.
.

ഈ കുട്ടികള്‍ ഇപ്പോള്‍ എവിടെയായിരിക്കും?

2010-12-07T22:00:00.001+05:30

പതിനഞ്ചു വര്‍ഷങ്ങള്‍ക്കുമുമ്പ് എന്റെ മുന്നില്‍
വരയ്ക്കാനായി ഇരുന്നു തന്ന ഈ കുഞ്ഞുങ്ങള്‍
ഇപ്പോള്‍ എവിടെയായിരിക്കും?
.
.

ജാസ്മിന്‍

ക്രിസ്റ്റീന

ഗിരിധര്‍

ലക്ഷ്മി

പേര് ഓര്‍ക്കുന്നില്ല

പേര് ഓര്‍ക്കുന്നില്ല.

കവിത

സാരംഗിയുടെ ഇന്‍സ്റ്റലേഷനുകള്‍

2010-12-06T21:49:00.005+05:30

മാലകള്‍ കൊണ്ടൊരു കുട്ടി
.

മറ്റൊരു കുട്ടി
.

വീണ്ടും ഒരു കുട്ടി.
.

ഈ കുട്ടിയാണ് ആ കുട്ടികളെ എല്ലാം ഉണ്ടാക്കിയ കുട്ടി.
.

തൃച്ചിയിലെ മയിലുകള്‍

2010-12-05T21:56:00.000+05:30

തൃച്ചിയിലെ ഒരു പാര്‍പ്പിട മേഘല.

വൃത്തിയുള്ള നിരത്തുകള്‍.

ചുറ്റും കുറ്റിക്കാട്.

മയിലുകള്‍ എവിടെയും യഥേഷ്ടം വിഹരിക്കുന്നു.

പാതയോരത്ത്, വീട്ടുവളപ്പില്‍, പൊന്തക്കാട്ടില്‍, നടുറോഡില്‍!

ചില പൂവാലന്മാര്‍ മരത്തിനു മുകളിലേക്കു പറന്നുകയറി

പ്രൌഡിയോടെ അവിടെ ഇരിപ്പുറപ്പിക്കുന്നു.

പെണ്‍‌മയിലുകള്‍ ചിതലുകളേയോ, പുഴുക്കളേയോ

ചിക്കിപ്പെറുക്കുന്നു.

ചില പൂവന്മാരെ കണ്ടാല്‍ പിടയാണെന്നേ തോന്നൂ!

വാലു പൊഴിഞ്ഞവ.

പുതിയ വാലുമുളയ്ക്കും വരെ നാണക്കേട് സഹിക്കണം.
.

ദേവദാരുച്ചോട്ടില്‍

2010-12-04T22:09:00.000+05:30

പൈന്‍ മരങ്ങള്‍ അഞ്ചുതരമുണ്ട് മനാലിയില്‍.
ദേവദാരുക്കളാണ് അവയില്‍ കൂടുതലും.
ആകാശത്തോളം ഉയരവും അതിനൊത്തവണ്ണവും,
നിറഞ്ഞ ഇലച്ചാര്‍ത്തുകളുമുള്ള പ്രൌഡവൃക്ഷങ്ങള്‍.

പാതയ്ക്ക് ഇരുവശവും മരങ്ങളാണ്.
ഒരു വശത്ത് മാനം മുട്ടുന്ന കുന്നുകള്‍ നിറയെയും
മറുവശത്ത്, അങ്ങു താഴെ നൂലായൊഴുകുന്ന ബിയാസ് നദിക്കരയോളവും.
ഞാന്‍ ചിത്രം വരയ്ക്കുമ്പോഴേക്കും സരിസ
അവളുടെ നനഞ്ഞ വസ്ത്രങ്ങള്‍ മാറ്റിക്കഴിഞ്ഞിരുന്നു.
.

ആന്ധ്രാപര്‍വ്വം

2010-12-03T21:11:00.001+05:30

.
പട്ടാളത്തിലെ രണ്ടു പോലീസുകാര്‍ ടെയിനില്‍ പരസ്യമായി
വെള്ളമടിയായിരുന്നത്രെ.
അതിലൊരുവന്‍ ഒരു ചെറുപ്പക്കാ‍രിയുടെ ഒരു കൈയ്യിലും
പിന്നെ രണ്ടുകൈകളിലും കയറിപ്പിടിച്ചെന്നും ചെറുപ്പക്കാരി
കണ്ണീരൊലിപ്പിച്ച് ഫോണിലൂടെ ഭര്‍ത്താവിനെ വിളിച്ചെന്നും
അടുത്ത സ്റ്റേഷനിലിറങ്ങിയെന്നുമൊക്കെ നേരം വെളുത്തിട്ടാണറിഞ്ഞത്.
.
ഹിജഡകളുടെ ഒരു സംഘം കയറി ആളുകളെ കളിയാക്കിയും
അപമാനിച്ചും കാശുകൈക്കലാ‍ക്കിയിറങ്ങി.
.
ഒരു കൊച്ചു വേശ്യ പുരുഷനോടൊപ്പം ടോയിലറ്റില്‍ കയറി
വസ്തങ്ങളഴിച്ചു. അത് വീഡിയോയില്‍ പകര്‍ത്താനായി
ഒരു സംഘം കൂടെ ചാടി കയറി.
ആകെ കശപിശയായി.
പെണ്ണ് ആദ്യം ചീറിയെങ്കിലും ഒടുവില്‍ ഓടി പാന്‍‌ട്രി കാറിന്റെ
കുശിനിയില്‍ കയറി.
പിറകേ സദാചാരപ്പോലീസുകാര്‍.
അപ്പോഴേക്കും ബോഗിയിലെ എല്ലാവര്‍ക്കും പെട്ടെന്ന്
ദാഹം വരുകയും എല്ലാവരും വെള്ളം അന്വേഷിച്ച്
പാന്‍‌ട്രി കാറിലേക്ക് തള്ളിക്കയറുകയും പെണ്ണ് നിന്ന
ഭാഗത്തേക്ക് അറിയാതെ നോക്കുകയും ചെയ്തു.
.
പേരക്കയും ചിക്കുവുമായി വില്‍പ്പനക്കാ‍രികള്‍ എത്തിയതോടെ
എല്ലാവരും തീറ്റിയിലേക്ക് ശ്രദ്ധ കേന്ദ്രീകരിച്ചു.
ചിക്കു വില്‍ക്കാന്‍ വന്ന തടിച്ച പെമ്പിളയോട്
പാന്‍‌ട്രിയിലെ ജോലിക്കാരന്‍ വഴി ഒതുങ്ങിനില്‍ക്കാന്‍
പറയുകയും അതിന് ‘സഹായിക്കുകയും’ ചെയ്തു.
.
അടുത്ത ഊഴം ഒരു യാചകബാലന്റെയായിരുന്നു.
അവന്‍ ഇഴഞ്ഞിഴഞ്ഞ് ഓരോ പുരുഷന്മാരുടെയും
അടുത്തു ചെന്ന് നാക്കുകൊണ്ട് ചില ആംഗ്യങ്ങളൊക്കെ
കാട്ടി തന്റെ കച്ചവടമുറപ്പിക്കാന്‍ ശ്രമിച്ചു.
.
വെളുത്തിരുട്ടിയിട്ടും പുറത്ത് അപ്പോഴും ആന്ധ്ര തന്നെ!
അന്‍‌വര്‍ സിനിമയില്‍ സലിം കുമാര്‍ പറയുമ്പോലെ
ആന്ധ്ര അങ്ങനെ നീണ്ടു പരന്നു കിടക്കുകയാണ്,
എന്തിനെന്നറിയാതെ.
.

പി റ്റി വര്‍ഗ്ഗീസ് - ട്രെയിനില്‍ വച്ചു പരിചയപ്പെട്ട മറ്റൊരു മലയാളി സുഹൃത്ത്
.

ഭോപ്പാല്‍ ദുരന്തം - ഒരു ട്രെയിന്‍ സ്റ്റോറി

2010-12-02T18:00:00.001+05:30

രാത്രി.
ഒഴിഞ്ഞു കിടന്ന ബര്‍ത്തുകളില്‍ കിടന്നവരെ ഒക്കെ
യഥാര്‍ത്ഥ ഉടമകള്‍ ചീത്തപറഞ്ഞു താഴെ ഇറക്കിച്ചു.
ഉറക്കച്ചടവില്‍ ഒരു അച്ഛനും മക്കളും കണ്ണു മിഴിച്ചു.
ഭോപ്പാല്‍ സ്റ്റേഷന്‍ എത്തി.
ഒരു തടിയന്‍ പ്രമാണി വണ്ടിയിലേക്കു കയറി.
കൂടെ ഭാര്യയും രണ്ടു ചെറുപ്പക്കാരും.
തലമുടി പറ്റെ വെട്ടി കുറ്റിത്താടിയും മീശയുമായി
ഏഴടി പൊക്കമുള്ളവന്‍ മകനായിരിക്കണം.
കാതില്‍ കടുക്കനിട്ട് കഴുത്തില്‍ ഷാള് ചുറ്റിയ പൊക്കം
കുറഞ്ഞവന്‍ ശിങ്കിടിയും.
റ്റീ റ്റി ആയിരം രൂപ പിഴ വാങ്ങി ഇരുത്തിയ യാത്രക്കാരെ
പ്രമാണിയും സംഘവും ബലം പ്രയോഗിച്ചു പൊക്കി!
ചോദിക്കാന്‍ ചെന്നവനൊക്കെ തെറിയും ചെറിയ തോതില്‍
തലോടലും കിട്ടി. പിടിച്ചടക്കിയ സൈഡ് ബര്‍ത്തില്‍
പ്രമാണിയും ഭാര്യയും ഇരിപ്പായി.
അപ്പര്‍ ബര്‍ത്തില്‍ ഉറങ്ങിക്കിടന്നവനെ ഉണര്‍ത്തി,
കാലു മടക്കി വയ്പിച്ചിട്ട് പെട്ടിയും കുടുക്കയും മറ്റും അവിടെ
വയ്ക്കുകയും ചെയ്തു!
ഇവന്മാരെ ചവിട്ടി ട്രെയിനില്‍നിന്നും താഴെ ഇടുന്നതായും
കഴുത്തില്‍ തോര്‍ത്തിട്ടുമുറുക്കി കൊന്നിട്ട് വാതിലിനു പുറത്തേക്ക്
എറിയുന്നതായിട്ടും ഒന്നു നടന്നില്ലെങ്കില്‍ അപ്പര്‍ ബര്‍ത്തില്‍
വച്ചിരിക്കുന്ന അവരുടെ ബാഗ് ബ്ലെയ്ഡു കൊണ്ട് കീറി
മുറിക്കുന്നതായും ഒക്കെ സ്വപ്നം കണ്ടുകൊണ്ട് ഞാന്‍ കിടന്നു.
എന്നെ പിടിച്ച് താഴെ കിടത്തിയിട്ട് എന്റെ ബര്‍ത്തും കൂടി
ഇവന്മാര്‍ കൈക്കലാക്കുമോ എന്നു ഭയന്ന് മുഖം കഴിയുന്നത്ര
ഗൌരവ ഭാവത്തില്‍ വച്ചുകൊണ്ടായിരുന്നു കിടപ്പ്.
കാലുകള്‍, ആരും സീറ്റില്‍ ചന്തിയുറപ്പിക്കാതിരിക്കാനായി
പരമാവധി നീട്ടി നിവര്‍ത്തിയും.
ഭാഗ്യത്തിന് ചെറുപ്പക്കാര്‍ തറ തിരഞ്ഞെടുക്കുകയായിരുന്നു.
.
സൈഡ് സീറ്റിനടിയില്‍ പെട്ടികള്‍ക്കിടയില്‍ ഒരു പെണ്‍കുട്ടി.
ചാക്കിനു മുകളില്‍ അവളുടെ അച്ഛന്‍. സീറ്റുകള്‍ക്കിടയില്‍,
ബാഗുകള്‍ക്കരുകില്‍ സഹോദരന്‍. ഇടനാഴിയില്‍ ഷീറ്റു വിരിച്ച്
പ്രമാണിയുടെ മകനും ശിങ്കിടിയും.
വാതിലിനും വാഷ് ബെയ്സിനുമിടയിലായി മറ്റു പത്തിരുപതുപേര്‍
എന്നിങ്ങനെ എല്ലാവരും ഉറക്കത്തിലായി.
.
എന്റെ എതിരേയുള്ള ബര്‍ത്തിലെ കുട്ടി ചുരുണ്ടു കിടന്ന തക്കം നോക്കി
ഒരാള്‍ കൂടെ കേറി കിടപ്പായി. കാലുകള്‍ വളച്ച് എന്റെ ബര്‍ത്തിലേക്കും.
നേരം പുലരും മുമ്പുതന്നെ നാഗ്പൂരെത്തി.
.
സീറ്റിനടിയില്‍ ചുരുണ്ടുകിടന്ന ചെമ്പന്‍‌മുടിക്കാരിയുടെ
പാറിപ്പറന്ന തലമുടി അച്ഛന്‍ കൈവിരല്‍ കൊണ്ട് മാടിയൊതുക്കിവച്ചു.
എന്നിട്ട് ചാക്കുകെട്ടും ബാഗുകളും മുഷിഞ്ഞ വസ്ത്രങ്ങളും അഴുക്കുപിടിച്ച
ശരീരങ്ങളുമായി അവര്‍ പുറത്തേക്കിറങ്ങി.
.
പ്രമാണിയെ സ്വീകരിക്കാന്‍ ഒരു പറ്റം ശിങ്കിടികള്‍ കൂടി എത്തിയിരുന്നു.
.
ഭോപ്പാലില്‍ നിന്നും രാതി കഴിച്ച മുട്ടക്കറി
ഒരു ദുരന്തമായിപ്പോയെന്ന് അപ്പോഴേക്കും ഞാന്‍
മനസ്സിലാക്കിത്തുടങ്ങിയിരുന്നു.
.

തുരന്തോ എക്സ്പ്രസ്സും യാചകരും.
.
അരുണ്‍ - കേരളാ എക്സ്പ്രസ്സില്‍ പരിചയപ്പെട്ട ഒരു മലയാളിസുഹൃത്ത്.
.

പിങ്ക് പേസ്റ്റല്‍‌സ്

2010-12-01T06:00:00.001+05:30

പേസ്റ്റലുകള്‍ കൊണ്ട് പണ്ട് വരച്ച
ചില ഡ്രോയിങ്ങുകള്‍.
.

ആമ്പല്‍‌കുളം

2010-11-29T21:47:00.000+05:30

തൊട്ടടുത്തുള്ള ചിലതിനെ നാം പലപ്പോഴും കാണാറില്ല.

ഇത് പുന്നമൂട്ടിലെ ഒരു കുളം.

എത്രയോ തവണ ഇതുവഴി നടന്നിരിക്കുന്നു.

മക്കളെ ചീരയും പയറും വാഴയും വളരുന്ന വയലു കാണിക്കാനായി ഇതുവഴിയാണ് പോകാറ്.

കൊക്കുകള്‍, മൊണ്ടികള്‍, താറാവുകള്‍...

ചിലപ്പോള്‍ കൂട്ടമായി പാറിപ്പോകുന്ന തത്തകള്‍...

അങ്ങനെ കാഴ്ചകള്‍ ഒരുപാടുണ്ട്.
.

നെയ്യാര്‍ ഡാം

2010-11-28T21:58:00.000+05:30

പണ്ട് പ്രൈമറി സ്കൂളില്‍ പഠിക്കുമ്പോഴാണ്

ആദ്യമായി നെയ്യാര്‍ ഡാമില്‍ പോകുന്നത്.

സര്‍ക്കാര്‍ ബസ്സിലായിരുന്നു അന്നത്തെയൊക്കെ എസ്കര്‍ഷനെന്നാണ് ഓര്‍മ്മ.

ഡാമിലേക്കുള്ള പഠനയാത്രയെപ്പറ്റിയും

അവിടെയുള്ള ജീവന്‍ തുളുമ്പുന്ന പ്രതിമകളെക്കുറിച്ചുമൊക്കെ

അന്നു ടീച്ചര്‍ ഞങ്ങളെക്കൊണ്ട് വിവരണമെഴുതിച്ചിരുന്നു.

പിന്നീട് കാഴ്ചകാണാനും ചിത്രം വരയ്ക്കാനുമൊക്കെയായി

എത്രയോ തവണ ഇവിടെ വന്നിരിക്കുന്നു.

മുതിര്‍ന്നപ്പോല്‍ യാത്ര കൂട്ടുകാരോടൊപ്പം ബൈക്കിലായെന്നുമാത്രം.

പൊന്തക്കാട്

2010-11-27T22:03:00.000+05:30

ട്രെയിനിലെ സെക്കന്റ് ക്ലാസ്സിന്റെ ഗന്ധവുമായി

ഉഷ്ണിച്ച് പുറത്തിറങ്ങിയപ്പോള്‍ ഫുട്ട്ബോര്‍ഡും നിറഞ്ഞു കവിയുന്ന

തിരക്കുമായി ലോക്കല്‍ ബസ്സുകള്‍!

എങ്ങനെയോ ഇവിടെ എത്തി.

ഇവിടം സ്വര്‍ഗ്ഗമാണെന്നു തോന്നിയതു വെറുതേയായിരുന്നില്ല.

പട്ടണത്തില്‍ നിന്നകന്ന് സ്വസ്ഥമായ ഒരു സ്ഥലം.

പൊന്തക്കാടുകളും ചെറുവഴികളും

കട്ടിയില്ലാക്കാറ്റും ഒക്കെയായി ഒരിടം.

കൂട്ടിന് ഒരു പറ്റം മയിലുകളും.
.

കടവ്

2010-11-26T22:00:00.000+05:30

ശബരിമല സീസണിലാണ് കുളനട സജീവമാകുന്നത്.

പന്തളത്തുള്ള അയ്യപ്പന്റെ അമ്പലത്തില്‍ തൊഴുതിട്ടാണ്

പലരും മല ചവിട്ടാന്‍ പോകാറ്.

മണ്ഡലകാലമാകുന്നതിന് തൊട്ടുമുമ്പ് ഈ ഭാഗത്തെ റോഡുകളില്‍

സ്ഥിരമായി കാണാറുള്ള കുഴികളും ഗര്‍ത്തങ്ങളും അപ്രത്യക്ഷമാകും.

ഇത് കുളനടയിലെ ഒരു കടവ്.

ഈ തോണികള്‍ നാളേറെയായി ഇവിടെയുണ്ട്.
.

കാളയില്ലാത്ത വണ്ടി

2010-11-24T23:39:00.004+05:30

.
.

തോവാളയാത്ര വരകളാല്‍ സമൃദ്ധമായിരുന്നു.
താമരപ്പൊയ്കകള്‍, തെങ്ങിന്‍ തോപ്പുകള്‍..
ജമന്തിപ്പൂപ്പാടങ്ങള്‍, നെല്‍‌വയലുകള്‍..
പിന്നെ, കൊളുന്തുമണമുള്ള കാറ്റും.
ദൈവം പണ്ടു കുഞ്ഞായിരുന്നപ്പോ,
മണ്ണപ്പം ചുട്ടുകളിച്ച പോലെ, എമ്പാടും
പാറക്കുന്നുകള്‍...

തോവാളയിലെ പൂച്ചന്ത കണ്ടുമടങ്ങുമ്പോഴാണ്

വഴിയോരത്ത് ഈ കാളയില്ലാത്ത വണ്ടി കണ്ടത്. വേറൊന്നുമാലൊചിച്ചില്ല.

അവിടെ കുത്തിയിരുന്നു. വര തുടങ്ങി.

മാര്‍ട്ടിന്‍ കൂടെത്തന്നെയുണ്ട്.

ഒന്ന്.. രണ്ട്.. മൂന്ന്... നാല് .. ആളുകള്‍ കൂടിക്കൂടി വന്നു.

കാഴ്ചകാണാന്‍ വന്നവരല്ല. പണിക്കാര്‍.

ഞാനിരുന്നത് ഒരു വര്‍ക്ക് ഷോപ്പിന്റെ പണിമുറ്റത്തായിരുന്നു.

പുലര്‍ച്ചയായതിനാല്‍ അറിഞ്ഞില്ല.

നിമിഷനേരം കൊണ്ട് എനിക്കുചുറ്റും യന്ത്രങ്ങളും

കവചങ്ങളും പണിയായുധങ്ങളും നിരന്നു.

എണ്ണയുടെയും ഗ്രീസിന്റെയും ഗന്ധം.

തട്ടലിന്റെയും മുട്ടലിന്റെയും ചുറ്റികക്കൊട്ടലിന്റെയും ശബ്ദം.

കടുക്കുന്ന വെയില്‍.

അതുകൊണ്ടെന്താ..

ചിത്രം വേഗം തീര്‍ക്കാന്‍ പറ്റി.

നഗ്നചിത്രങ്ങള്‍

2010-11-23T06:11:00.000+05:30

പതിനാറു വര്‍ഷങ്ങള്‍ക്കു മുമ്പ് വരച്ച
ആരും കാണാത്ത ചില ചിത്രങ്ങള്‍!
.

ഒരു സാഹസിക യാത്രയുടെ അന്ത്യം.

2010-11-21T21:30:00.004+05:30

ഏലിയാസ് സാര്‍ - കോടമഞ്ഞിന്‍ തണുപ്പില്‍ നിന്നും
കൊടും ചൂടിലേക്ക്.

യഥാര്‍ത്ഥ സാഹസിക യാത്ര ആരംഭിച്ചത്
ശരിക്കും കേരളാ എക്സ്പ്രസ്സില്‍ കയറിയതോടെയായിരുന്നു.
ചൂട് അസഹ്യം.
ഒരു വശത്ത് പാ‍ന്‍ഡ്രി കാര്‍.
മറുവശത്ത് ഏ സി കോച്ച്.
ഓടിവന്നു കയറുന്നവരൊക്കെ ഞങ്ങളുടെ ഭാഗത്ത്.
ലോക്കല്‍ ട്രെയിന്‍ പോലെ തിങ്ങി നിറഞ്ഞ കോച്ച്.
രാജസ്ഥാന്‍, ഗുജറാത്ത്, മധ്യപ്രദേശ്....
തിളച്ചു മറിയുന്ന വായുവും മണ്ണും.
ഇടയ്ക്കിടയ്ക്ക് റ്റി റ്റി മാര്‍ വരും.
കഞ്ഞി കുടിക്കാന്‍ വകയില്ലാത്തവരോടും
നൂറും ആയിരവും പിഴ വാങ്ങും.
.

റോക്ക് ഗാര്‍ഡനിലെ ഇണകള്‍
.

ഊഞ്ഞാലാടുന്ന ബാലന്‍ - ചണ്ഡിഗഡിലെ റോക്ക് ഗാര്‍ഡനില്‍ നിന്ന്.
.

ദില്ലിയിലേക്കുള്ള വഴി
.

മടക്കയാത്രയ്ക്കിടയില്‍ വരച്ച മലയുടെ ചിത്രം.
.

അങ്ങനെയും ഇങ്ങനെയും

2010-11-20T17:58:00.001+05:30

ഫാന്‍സി ഡ്രസ് മത്സരത്തിനിടയിലെടുത്ത
ചില ഫോട്ടോഗ്രാഫുകള്‍
.

ഭക്തിയും വിഭക്തിയും
.

അക്കരയും ഇക്കരയും
.

കാടും നാടും
.

ഒരുങ്ങിയും ഒരുങ്ങാതെയും
.

പാടിയും ആടിയും
.

അന്നും ഇന്നും
.
.

റോക്ക് ഗാര്‍ഡന്‍

2010-11-19T21:23:00.000+05:30

.
റോക്ക് ഗാര്‍ഡനില്‍ ടൂറിസ്റ്റുകളുടെ തിരക്കായിരുന്നു.
.

.
പ്രാതല്‍ കഴിക്കാന്‍ ഞങ്ങള്‍ നന്നേ പ്രയാസപ്പെട്ടു.
ഒരു ഓട്ടോറിക്ഷ വിളിച്ച് മറ്റൊരു സെക്റ്ററില്‍ പോയാണ്
ഭക്ഷണം ഒപ്പിച്ചത്.
.

.
ഉദ്യാനത്തിനുള്ളില്‍ എല്ലാവരും ഫോട്ടോ എടുക്കാനും
വെള്ളം കുടിക്കാനുമാണ് സമയം ചിലവഴിച്ചത്.
.

.
ഒഴിഞ്ഞ കുപ്പികള്‍ നിലത്തിട്ടാല്‍ 500 രൂപ പിഴ
എന്ന ബോര്‍ഡ് പലയിടത്തും ഉണ്ടെങ്കിലും
നിലത്ത് ചിതറിക്കിടക്കുന്ന പ്ലാസ്റ്റിക് കുപ്പികള്‍ കണ്ടാല്‍
ഉദ്യാന പാലകര്‍ കോടീശ്വരന്മാരായിട്ടുണ്ടാകുമെന്നു തോന്നും!
.

.
മലയിലെ തണുപ്പില്‍ എത്ര തണുത്ത വെള്ളത്തിനും
പ്രശ്നമില്ലായിരുന്നു.
ഇവിടെ ഈ കൊടും ചൂടില്‍ ആദ്യത്തെ തണുത്ത
കോക്കു തന്നെ തൊണ്ടയെ തറ പറ്റിച്ചു.
.

ഗൈഡ്

2010-11-18T20:43:00.001+05:30

“ഒരു ഗൈഡിനെ വിളിക്കൂ...
ഒരു ഗൈഡിനെ വിളിക്കൂ..”
രാവിലേ തന്നെ ഡ്രൈവര്‍ വിലപിക്കാന്‍ തുടങ്ങി.
.

.
ഒടുവില്‍ ഒരു റിക്ഷാക്കാരനെ തുണയായിക്കിട്ടി.
.

.

വഴിയില്‍ സ്ഥാപിച്ചിരുന്ന ചണ്ഡിഗഡിന്റെ മാപ്പു കണ്ടപ്പോഴാണ്
ഡ്രൈവറുടെ വെപ്രാളത്തിന്റെ കാര്യം മനസ്സിലായത്.
.

.
ഒന്നാം ക്ലാസ്സിലെ കണക്കുപുസ്തകത്തിലെ പോലെ
നെടുകയും കുറുകയും കളം വരച്ചമാതിരിയാണ്
ഇവിടുത്തെ റോഡുകള്‍!
റോഡുകള്‍ക്കിടയിലുള്ള ചതുരങ്ങളെല്ലാം ഓരോ
അക്കങ്ങളിലൂടെയാണ് അറിയപ്പെടുന്നത്.
സെക്റ്റര്‍ 47, 28, 29 എന്നിങ്ങനെ.
.

.

കോവളത്തെ പെണ്‍കുട്ടി

2010-11-17T23:36:00.001+05:30

കോവളത്തെ കടല്‍ത്തീരത്ത് എത്രയോ തവണ.
അച്ഛനായിരുന്നു ആദ്യത്തെ കമ്പനി.
പിന്നെ മകള്‍...

റെയില്‍‌വേസ്റ്റേഷന്‍.., ചന്ത.., മൃഗശാല.., മൈതാനം...

അങ്ങനെ, സ്കെച്ചുചെയ്യുവാന്‍ പുതിയ മേച്ചില്‍പ്പുറം തേടിയാണ്

അന്ന് കോവളത്തെത്തിയത്.

പ്രദീപും വിമല്‍‌രാജും ബാലകൃഷ്ണനും ഗിരീഷുമൊക്കെയായിരുന്നു കൂട്ട്.

വെയിലുകായുന്ന വിനോദസഞ്ചാരികളെ

അവരറിയാതെ കടലാസില്‍ കോറിയിടവേ

ദാ.. ഒരു മദാമ്മ എന്നെ നോക്കി ചിരിക്കുന്നു.

എത്ര വര്‍ഷങ്ങള്‍....

കോവളം.. ഇപ്പോഴും എത്ര മനോഹരം!

ഇത് ഒരു പുതിയ ചിത്രം.

ചണ്ഡിഗഡിലെ പ്രാതല്‍

2010-11-16T21:31:00.006+05:30

ചണ്ടിഗഡിലെ ചായക്കച്ചവടക്കാരന്‍.

ഹോട്ടലുകളന്വേഷിച്ച് കണ്ണു കഴച്ചു.
ഡ്രൈവര്‍ രാത്രി മുഴുവന്‍ വണ്ടിയോടിച്ച മുഷിച്ചിലിലാണ്.
എല്ലാവര്‍ക്കും നല്ല വിശപ്പ്.
ഗൈഡ് ഒരു സ്ഥലം പറഞ്ഞു.
അവിടെ എത്തിയപ്പോ, ഉച്ചയാവുമ്പോഴേക്കേ എന്തെങ്കിലും
കിട്ടൂ എന്നു മനസ്സിലായി.
ഇനി എന്തു ചെയ്യും?
ഏതെങ്കിലൂം ബേക്കറിയില്‍ പോയി ബ്രെഡും ജാമും വാങ്ങാം.
ഞങ്ങള്‍ തീരുമാനിച്ചു.
ബേക്കറി പോയിട്ട് ഒരു പെട്ടിക്കട പോലും അടുത്തെങ്ങുമില്ല.
ഇവിടെ കടകളെല്ലാം ഒരു ഭാഗത്തും വീടുകള്‍ മറ്റൊരു ഭാഗത്തും
ഓഫീസുകള്‍ വേറൊരുഭാഗത്തുമാണെന്നു തോന്നുന്നു.
ഗൈഡ് പറഞ്ഞു. ചന്തയില്‍ ഒരു ബേക്കറിയുണ്ട്.
ഡ്രൈവര്‍ അപ്പോഴേക്കും വണ്ടി പാര്‍ക്കു ചെയ്ത് ഉറക്കമായിരുന്നു.
.
ഒരു ഓട്ടോറിക്ഷ പീടിച്ച് മാര്‍ക്കറ്റില്‍ ചെന്നു.
മാര്‍ക്കറ്റെന്നു പേരേയുള്ളൂ.
അഞ്ചാറു കടകള്‍.. കഴിഞ്ഞു.
ഒരു ബേക്കറിയില്‍ കയറി.
റൊട്ടിയുണ്ട്. ജാമില്ല.
കുറച്ചു മാറി മറ്റൊരു കടയില്‍ ആലൂ പറോട്ട ഉണ്ടാക്കുന്നു.
ചുട്ടെടുത്തതെല്ലാം കൂടി പൊതിഞ്ഞു തരാന്‍ പറഞ്ഞു.
കൂടെ അല്പം അച്ചാറും.
പഴക്കച്ചവടക്കാരന്റെ പക്കല്‍ നിന്നും മൂന്നാലു പടല പഴം വാങ്ങി.
മറ്റൊരു കടയില്‍ നിന്നും പാലും പിന്നെ,
ബേക്കറിയില്‍ നിന്നും കുറച്ചു കുക്കീസും.
റോക് ഗാര്‍ഡന്‍ തുറക്കാന്‍ ഇനിയും സമയമുണ്ടായിരുന്നു.
കരിങ്കല്‍ പടവുകളില്‍ കുട്ടികളെ നിരത്തിയിരുത്തിയിട്ട്
കിട്ടിയതെല്ലാംകൂടി പങ്കുവച്ചു.
ഒരു മരച്ചുവട്ടില്‍ ഒരു ചായക്കാരന്‍ ഇരിക്കുന്നുണ്ടായിരുന്നു.
ചെറിയ കച്ചവടം മാത്രം.
മാര്‍ക്കറ്റില്‍നിന്നും വാങ്ങിയ പാല്‍ അയാളെ ഏല്‍പ്പിച്ചു.
എല്ലാവര്‍ക്കും ചായ ഉണ്ടാക്കിത്തരാന്‍ പറഞ്ഞു.
അങ്ങനെ ഒരു വിധം ബ്രേക് ഫാസ്റ്റ് ഒപ്പിച്ചു.
.

റോക് ഗാര്‍ഡനിലെ ശില്പങ്ങള്‍
.

.

അഹമ്മദാബാദിലെ പഴയ കെട്ടിടം

2010-11-11T18:30:00.002+05:30

.
അഹമ്മദാബാദില്‍ ഇരുപത്തൊന്നു ദിവസം.
സസ്യഭക്ഷണവും യോഗാഭ്യാസവും എന്നെ മറ്റൊരു മനുഷ്യനാക്കി മാറ്റി.
നാട്ടില്‍ തിരിച്ചെത്തിയപ്പോ, എന്റെ റ്റീ ഷര്‍ട്ട് പൊക്കിനോക്കിയിട്ട്
ഭാര്യ കുടുകുടെ ചിരിക്കാന്‍ തുടങ്ങി.
എന്റെ കുടവയര്‍ was totally missing.
എന്നാല്‍ സത്യത്തില്‍ മിസ് ചെയ്തത് മറ്റുചിലതായിരുന്നു.
വളരെ പാടുപെട്ടുവരച്ച ചില പ്രിയചിത്രങ്ങള്‍.
ഭാഗ്യത്തിന് ഇതുമാത്രം കയ്യിലിരുന്നു.
.
എട്ടുകൊല്ലം‌മുമ്പ് അഹമ്മദാബാദിലെ
ഒരു റോഡരുകിലിരുന്നു വരച്ച ചിത്രമാണിത്.
കുട്ടികളുപയോഗിക്കുന്ന വാട്ടര്‍കളര്‍ കേക്കുകളായിരുന്നു മാധ്യമം.
വര്‍ഷങ്ങള്‍‌ക്കു ശേഷം ചേതന്‍ ഭഗത്തിന്റെ
“ത്രീ മിസ്റ്റേക്‍സ് ഇന്‍ മൈ ലൈഫ്” വായിച്ചപ്പോള്‍ തോന്നി,
അതിലെ ഉപേക്ഷിക്കപ്പെട്ട ബാങ്ക് കെട്ടിടം ഇതുതന്നെയാണോ എന്ന്.
.

ഒറ്റനാണയം

2010-11-04T21:42:00.003+05:30

.
ടിക്കറ്റിനു 16രൂപ.
ചില്ലറയില്ല.
“ഒരു രൂപ തരൂ”. അഞ്ചുരൂപ നോട്ടു നീട്ടിയിട്ട്
കൌണ്ടര്‍മാന്‍ പറഞ്ഞു.
മടിയില്‍ തപ്പി. കാശില്ല.
കൂട്ടുകാരോടു ചോദിച്ചു. രക്ഷയില്ല.
ട്രെയിന്‍ വരുന്നുണ്ട്.
വാക്കുപാലിക്കാന്‍ നില്‍ക്കാതെ പ്ലാറ്റ്ഫോമിലേക്ക് ഓടി.
.
ട്രെയിനിനുള്ളില്‍ സീറ്റുതരപ്പെട്ടതോടെ ആശ്വാസമായി.
കാഴ്ചകള്‍ കണ്ട് കുറച്ചുനേരം.
ഒരു പാട്ടു കേള്‍ക്കുന്നുണ്ട്.
ഒരു പെണ്ണ്. പതിനാറു പതിനേഴു പ്രായം തോന്നും.
മൊട്ടയടിക്കപ്പെട്ട ശിരസ്സ്.
ഒട്ടും ഓമനത്തം തോന്നാ‍ത്ത മുഖം.
മാറാപ്പില്‍ കുഞ്ഞ്.
പിന്നാലെ കഷ്ടിച്ച് നടക്കാന്‍ പഠിച്ച മറ്റൊരു കുഞ്ഞ്.
ഇനി മൂന്നാമതൊരെണ്ണം അവളുടെ വയറ്റിനുള്ളിലും
ഉണ്ടെന്ന് വ്യക്തം.
.
പരുക്കന്‍ പാട്ടു നിര്‍ത്തി അവള്‍ കയ് നീട്ടിത്തുടങ്ങി.
എന്റെ പോക്കറ്റിനുള്ളിലെ അഞ്ചുരൂപയെപ്പറ്റി ഞാനോര്‍ത്തു.
എന്നാല്‍ അനങ്ങിയില്ല.
ആരും അവര്‍ക്ക് ഒന്നും കൊടുത്തില്ല. ഞാനും.
രണ്ടു സെക്കന്റ്.
ട്രെയിന്‍ നിന്നു.
വീണ്ടും ചലിച്ചു.
.
അതാ, ആരോ അവള്‍ക്ക് ഒരു ഒറ്റരൂപ കൊടുക്കുന്നു.
കുഞ്ഞുങ്ങളുമായി അവള്‍ വാതില്‍ക്കലേക്കു നീങ്ങി.
ട്രെയിനിനു വേഗം വച്ചു തുടങ്ങിയിരുന്നു.
ഒരു നിമിഷം.
കൈക്കുഞ്ഞിനെ മാറോടടക്കി, ചെറിയവന്റെ കരം ഗ്രഹിച്ച്
നിറവയറുമായി അവള്‍ മറഞ്ഞു.

ഹിന്ദുച്ചായയും മുസ്ലീം കബാബും.

2010-11-03T17:23:00.004+05:30

.
മുംബയിലെ ജെ ജെ സ്കൂള്‍ ഓഫ് ആര്‍ട്ട്സില്‍ നിന്നും പുറത്തിറങ്ങി
ഇടത്തോട്ടു നടന്നാല്‍ എത്തുന്നത് തിരക്കുപിടിച്ച ഒരു മാര്‍ക്കറ്റിലേക്കാണ്.
കടമുറികളും തിണ്ണകളും നടപ്പാതയും നടുറോഡും നിറഞ്ഞു കവിഞ്ഞ്
പലനിറത്തിലും തരത്തിലുമുള്ള ചരക്കുകള്‍.
ഉന്തുവണ്ടികളും കാറുകളും തലച്ചുമടുമായി വരുന്ന തൊഴിലാളികളും
തൊട്ടുരുമ്മിക്കടന്നു പോകും.
.
ടോള്‍സ്റ്റോയിയുടെ ‘ഒരാള്‍ക്കെത്ര ഭൂമിവേണം’ എന്ന കഥയിലെപ്പോലെയാണ്.
മുന്നോട്ടു മുന്നോട്ടു പോകുംതോറും കാഴ്ചകള്‍ ഭ്രമിപ്പിച്ചുകൊണ്ടിരിക്കും.
എത്രനേരം നടന്നെന്നറിയില്ല.
ദാഹം കലശലായി.
വഴിയോരക്കച്ചവടക്കാരുടെ കരിമ്പിന്‍ ജ്യൂസും നാരങ്ങാവെള്ളവും മറ്റും
വാങ്ങിക്കുടിക്കാന്‍ ധൈര്യം പോര.
ഇടവഴികള്‍ തിരിഞ്ഞു തിരിഞ്ഞു നോക്കിയെങ്കിലും ഒരു
ഹോട്ടല്‍ പോലും കണ്ണില്‍ പെട്ടില്ല.
തിരക്കല്‍പ്പം ഒഴിഞ്ഞ കവലയില്‍ ഉന്തുവണ്ടിയില്‍ ചാരിയിരുന്ന
ചെറുപ്പക്കാരനോടു ചോദിച്ചു.
‘ഇവിടെയടുത്തെവിടെയെങ്കിലും ചായയോ വെള്ളമോ കിട്ടുമോ സഹോദരാ’.

അയാല്‍ ഒരു നിമിഷം എന്റെ മുഖത്തേക്കു നോക്കി.
എന്നിട്ട് ഇടത്തേക്കു കയ് ചൂണ്ടിപ്പറഞ്ഞു.
‘അവിടെ ഒരു മുസ്ലീം ഹോട്ടലുണ്ട്.
എന്നിട്ട് വലത്തേക്ക് കയ് ചൂണ്ടി.
‘അവിടെയാണ് ഹിന്ദുക്കളുടെ ഹോട്ടല്‍’.

വണ്ടിയില്ലാത്ത കാള

2010-11-01T06:00:00.001+05:30

.
It was a sultry afternoon.
The dirty dust of the Nagarkovil was showering all over our bodies
with the hot and naughty wind.
This bull was resting in the middle of the road
and we were on the broken slabs over the sewage near the bus stand.
Martin brought some stones to prevent my paper from flying off.
We were really mad.
A crowd appeared to watch this tamasha.
.
മാര്‍ട്ടിനോടൊപ്പം തോവാളയിലും മറ്റും കറങ്ങിയ കൂട്ടത്തില്‍ ചെയ്ത
രണ്ടു ചിത്രങ്ങളായിരുന്നു “വണ്ടിയില്ലാത്ത കാള“യും “കാളയില്ലാത്ത വണ്ടി“യും.
ഞാന്‍ പയ്യന്നൂരിലേക്കും പിന്നീട് അടൂരേക്കും പോയപ്പോള്‍
വീട്ടില്‍ അച്ഛനും അമ്മയും ഒറ്റയ്ക്കായിരുന്നു.
അവരെ കാണാനായി വല്ലപ്പോഴും എത്തുന്ന എന്നെ
പൂമുഖത്തുവച്ചിരുന്ന ഈ ചിത്രം പലപ്പോഴും അസ്വസ്ഥനാക്കി.

rain tree . മഴമരം

2010-10-29T21:52:00.003+05:30

.
This is one of my three watercolour paintings
done during the stay at Puducheri.
When I see this picture, I recollect
the old couple whom I met under this rain tree.
They were waiting near the culvert with their
moped to get someone’s help.
The lady was too weak to climb and
sit on the seat of that moped.
….. When the old man and old woman gave me a thankful smile,
for a moment, I thought, I have done a great thing!

മഴമരത്തിന്റെ തണലത്ത് മോപ്പെഡുമായി നില്‍ക്കുകയാണ് അവര്‍.
വൃദ്ധദമ്പതികള്‍.
മുത്തശ്ശിക്ക് മോപ്പെഡിലേക്ക് കയറാന്‍ വയ്യ.
ഒരു കൈ സഹായം വേണം.
എത്ര നിസ്സാരമായ ഒരു സഹായം!
പക്ഷേ, നന്ദിപൂര്‍വ്വമുള്ള ആ പുഞ്ചിരി...
...എത്ര അമൂല്യം!

ചോലയില്‍ said...

നന്നായി.
വരയും വാക്കുകളും.

October 26, 2008 5:56 PM

lakshmy said...

ചിത്രം മനോഹരം. ചിത്രകാരന്റെ മനസ്സൂം

October 27, 2008 12:34 AM

ഗോപക്‌ യു ആര്‍ said...

thanks my dear friend...

December 7, 2008 7:10 PM

ഇലക്ഷന്‍ സ്പെഷ്യല്‍

2010-10-23T06:00:00.001+05:30

ഏതടുത്താലും പത്തുരൂപ!

.
എല്ലാ തിരഞ്ഞെടുപ്പുകാലത്തും ചാനലുകളില്‍ കാട്ടുന്ന
“പഞ്ചവടിപ്പാലം” എന്ന സിനിമ പോലെ
ഒരു പുന ‘സം‌പ്രേക്ഷണ‘മാണിത്.
2007 നവംബര്‍ 18നു പൂശിയ ‘സ്പെഷ്യല്‍ പോലീസ് ഓഫീസര്‍‘ എന്ന
പോസ്റ്റ് വായിച്ചിട്ടുള്ളവരോടു ക്ഷമ ചോദിക്കുന്നു.
(അവര്‍ ദയവായി തിരികെപ്പോവുക)
.

"സ്പെഷല്‍ പോലീസ്‌ ഓഫീസര്‍"

ഇലക്ഷന്‍ ഡ്യൂട്ടിയുടെ ഓര്‍ഡര്‍ വന്നു.

എല്ലാവര്‍ക്കും കിട്ടി പണി.

ഞാനും രതീഷ്‌ മാഷും മാത്രം ഔട്ട്‌.

ആഹാ..... എന്തൊരാശ്വാസം!

കല്യാണം കഴിഞ്ഞ സമയമാണ്‌.

പുതുമോടി മാറിയിട്ടില്ല.

വേഗം ചെന്ന് നാട്ടിലേക്കുള്ള ടിക്കറ്റ്‌ബുക്കുചെയ്തു.

ഡ്യൂട്ടിഫുള്‍ സഹപ്രവര്‍ത്തകര്‍ അസൂയയോടെ ഞങ്ങളെ നോക്കി.

തിരഞ്ഞെടുപ്പുദിനം അടുത്തടുത്തു വന്നു.

എന്റെ സന്തോഷം കൂടിക്കൂടിയും.

അങ്ങനെ ഇരിക്കെ അതാ വരുന്നു ഇടിവെട്ടു പോലൊരു കല്‍പ്പന.

വടക്കന്‍ ജില്ലകളില്‍ പോലീസ്‌ ഫോഴ്സിന്‌ കനം പോരാത്തതിനാല്‍ ഇലക്ഷന്‍ ഡ്യൂട്ടി ലഭിച്ചിട്ടില്ലാത്ത പുരുഷപ്രജകളെ രായ്ക്കുരാമാനം അടുത്തുള്ള പോലീസ്‌ ക്യാമ്പില്‍ എത്തിക്കുക.

കിട്ടിയ ചാര്‍ത്തുമായി ഞാനും രതീഷ്‌ മാഷും പിറ്റേന്ന് കാലത്ത്‌ കണ്ണൂരിലേക്ക്‌ വണ്ടികയറി.

ആദ്യം ചെന്നത്‌ റെയില്‍ വേ സ്റ്റേ ഷനിലേക്കാണ്‌;

എടുത്ത ടിക്കറ്റ്‌ ക്യാന്‍സല്‍ ചെയ്യാന്‍.

പാതിക്കാശ്‌ പോയിക്കിട്ടി.

പോലീസ്‌ ക്യാമ്പില്‍ ചെന്നപ്പോള്‍ പട്ടാളത്തിലെടുക്കാനുള്ളത്ര തിരക്ക്‌.

ഞാനും മാഷും അതീവ ഭവ്യതയോടും ദൈന്യതയോടെയും ഉള്ള വെയിലെല്ലാം കൊണ്ട്‌ ഊഴം കാത്തു നിന്നു.

അപ്പോഴാണ്‌ ഏതോ കുബുദ്ധികല്‍ ഞങ്ങള്‍ക്ക്‌ ഇങ്ങനെ ഒരു ഉപായം പറഞ്ഞുതന്നത്‌. "അംഗബലം ആയിക്കഴിഞ്ഞു.

ഇനി പത്തോ ഇരുപതോ പേര്‍ കൂടി മതിയാകും.

അതിനാല്‍ ഏമാന്മാരുടെ കണ്ണില്‍പ്പെടാതെ അങ്ങോട്ടോ ഇങ്ങോട്ടോ മാറി നില്‍ക്കുന്നതാണ്‌ ബുദ്ധി". നിര്‍ഭാഗ്യത്തിന്‌ ഞങ്ങളേക്കാള്‍ വിരുതന്മാരായിരുന്നു കൂടെ നിന്നിരുന്നവര്‍.

മുങ്ങല്‍ വിദഗ്ദ്ധര്‍!..കശ്മലന്മാര്‍... ഞങ്ങളെ തനിച്ചാക്കി എങ്ങോ പോയ്‌ മറഞ്ഞു.

പിന്നെല്ലാം പെട്ടെന്നായിരുന്നു.

വീണൂ കുറി ഞങ്ങള്‍ രണ്ടുപേര്‍ക്കും.

പിറ്റേന്നു കാലത്ത്‌ എട്ടുമണിക്ക്‌ 'ചൊക്ലി സ്റ്റേഷനില്‍ റിപ്പോര്‍ട്ട്‌ ചെയ്യണം.

ചിരിക്കാനും കരയാനും കഴിയാതെ ഞങ്ങള്‍ അടുത്തുള്ള പെട്ടിക്കടയില്‍ പോയി ഓരോ സോഡാനാരങ്ങാവെള്ളം കുടിച്ച്‌ ഞങ്ങളുടെ വികാരവിക്ഷോഭങ്ങളെ അടക്കി.

ചൊക്ലി സി. ഐ. ഒരു സിനിമാനടനേപ്പോലെ സുന്ദരനായിരുന്നു.

പിന്‍ഭാഗമാകട്ടെ ഒരു സിനിമാനടിയുടെ പോലെ വശ്യവും.

കുറുവടിയൊക്കെക്കറക്കി ആശാന്‍ ഉച്ചയോടെ സ്റ്റേഷനിലെത്തിയതൊടെ ഞങ്ങളുടെ മോര്‍ണിംഗ്‌ സെഷന്‍ കാത്തിരിപ്പിനു വിരാമമായി.

ഡ്യൂട്ടി ഓര്‍ഡറായി.

പാപി ചെല്ലുന്നിടം പാതാളം!

പാനൂരിലെ പാറാല്‍ എല്‍. പി. സ്കൂളിലാണ്‌ ഞങ്ങള്‍ക്ക്‌ പാറാവ്‌.

ദാസനെ ബോംബെറിഞ്ഞുകൊന്ന അതേ ഭീകരസ്ഥലം.

"തലശ്ശേരി! >പാനൂര്‍!! >പാറാല്‍!!!" ഞരമ്പുകള്‍ വലിഞ്ഞുമുറുകി വിറകൊണ്ടയഞ്ഞതോടെ ഒരു ചെമ്പരത്തിപ്പൂ കിട്ടിയാല്‍ ചെവിയില്‍ വയ്ക്കാമെന്ന അവസ്ഥയായി.

അതോടെ എല്ലാ പേടിയും ഓടിയകന്നു.

" ഡര്‍ കേ ആഗേ ജീത്ത്‌ ഹേ".

പോലീസ്‌ എന്ന് കടലാസിലെഴുതിയൊട്ടിച്ച നൂറുകണക്കിന്‌ വാടക(?)ജീപ്പുകളിലൊന്നില്‍ ഞങ്ങള്‍ പാറാലേക്ക്‌ പാഞ്ഞു.

പിറ്റേന്നുനേരം എങ്ങനെയൊക്കെയോ പുലര്‍ന്നു.

ഞാന്‍ എന്റെ ഏറ്റവും നല്ല വസ്ത്രങ്ങള്‍ അണിഞ്ഞു.

ആദ്യത്തെ ശമ്പളത്തിനു വാങ്ങിയ ലോട്ടസ്‌ ബാവയുടെ ബ്രൗണ്‍ ഷൂസുകളിട്ടു.

'സ്പെഷ്യല്‍ പോലീസ്‌ ഓഫീസര്‍' എന്നെഴുതിയ നീല ബാന്‍ഡ്‌ ഷര്‍ട്ടിന്റെ ഇടത്തേ കയ്ക്കുമീതേ കെട്ടി. രണ്ടു ബൂത്തുകളുണ്ട്‌ പാറാല്‍ സ്കൂളില്‍.

ഒന്നില്‍ ഞാനും ഒരു എക്സ്സ്‌-സര്‍വ്വീസുകാരനും.

മറ്റേതില്‍ ഒരു പോലീസുകാരനും ഒരു എക്സയ്സുകാരനും.

രതീഷ്‌ മാഷിനെ മറ്റൊരു ബൂത്തിലേക്ക്‌ കൊണ്ടുപോയി.

വോട്ടെടുപ്പാരംഭിച്ചു.

വോട്ടര്‍മാരുടെ നീണ്ട നിര.

ചെറുപ്പക്കാര്‍... ചെറുപ്പക്കാരികല്‍...

വെറും പോലീസല്ലല്ലോ, സ്പെഷ്യല്‍ പോലീസ്‌ ഓഫീസറല്ലേ.. ഒട്ടും ഗമ വിട്ടില്ല.

ബൂത്തിനു വെളിയില്‍ മസിലു പിടിച്ച്‌ സ്റ്റയിലായിട്ടു നിന്നു.

പത്തു പത്തരയായിക്കാണും, അകത്ത്‌ ഭയങ്കര ഒച്ചപ്പാട്‌.

ആരാണ്‌ നിയമം കയ്യിലെടുക്കുന്നത്‌? ഏന്നിലെ പോലീസ്‌ രക്തം തിളച്ചു.

കമാന്‍ഡോ ഓപ്പറേഷനിലേതുപോലെ അകത്തേക്ക്‌ ചാടിവീണു.

ഹയ്‌... എന്താ ഇത്‌!

കയ്യാംകളിയിലെ കഥാപാത്രങ്ങള്‍ രണ്ട്‌. നിയമപാലകര്‍ നാല്‌.

ഞാന്‍ പഠിച്ച കണക്കനുസരിച്ച്‌ രണ്ടു പോലീസുകാര്‍ ഒന്നാമനേയും മറ്റുരണ്ടുപേര്‍ രണ്ടാമനേയും പിടിച്ചുമാറ്റണം.

എന്നാല്‍ ഇവിടെ സ്ഥിതി മറ്റൊന്നാണ്‌.

മൂന്നുപേര്‍ ചേര്‍ന്ന് നീറുപോലിരിക്കുന്ന ഒരുത്തനെ അടക്കം പിടിച്ചിരിക്കുന്നു.

മറ്റവന്‍ പാരതന്ത്ര്യത്തിന്റെ ചങ്ങലക്കെട്ടുകളില്ലാതെ ഘോരഘോരം ഗര്‍ജ്ജിക്കുന്നു.

കര്‍മ്മം ചെയ്യുകയാണെല്ലോ നമ്മുടെ ധര്‍മ്മം.

ഞാന്‍ ഒരു നിമിഷം പോലും വേസ്റ്റാക്കിയില്ല.

കടന്നുപിടിച്ചു ഒറ്റയാനെ.

സംഗതി കൂള്‍.

പ്രശ്നം അവസാനിച്ചു.

നീറുപോലുള്ള മനുഷ്യന്‍ ക്ഷുഭിതനായി സ്ഥലം കാലിയാക്കിയതായിരുന്നു പ്രശ്നം അവസാനിക്കാനുള്ള യഥാര്‍ഥ കാരണം.

എങ്കിലും എനിക്ക്‌ എന്നോടു വലിയ ബഹുമാനം തോന്നി.

എന്നാല്‍ എല്ലാം ഏതാനം നിമിഷങ്ങള്‍ക്കു മാത്രമായിരുന്നു.

എല്ലാവരും എന്നെ വളരെ ദയയോടെ നോക്കുന്നത്‌ ഒരു ഞെട്ടലോടെ ഞാന്‍ തിരിച്ചറിഞ്ഞു. ആവേശത്തോടെ ഞാന്‍ പിടിച്ചുമാറ്റിയ ആളെ മറ്റാരും പിടിച്ചു മാറ്റാന്‍ മുതിരാതിരുന്നത്‌ യാദ്രിശ്ചികമായിരുന്നില്ലെന്ന് വയ്കിയാണെങ്കിലും ഞാന്‍ നടുക്കത്തോടെ മനസ്സിലാക്കി.

ഉച്ചയ്ക്ക്‌ ഊണുകഴിച്ചത്‌ തൊണ്ട വഴി താഴോട്ടിറങ്ങിയില്ല.

പുറത്തു പാര്‍ട്ടിപ്രവര്‍ത്തകര്‍ കൂട്ടം കൂടുന്നു.

സ്കൂളിനു ചുറ്റുമുള്ള വേലിക്കപ്പുറത്തുനിന്നുമുള്ള തീക്ഷ്ണമായ കണ്ണുകള്‍ എന്നെ വിയര്‍പ്പില്‍ കുളിപ്പിച്ചു. ജീവിതത്തിലെ ഏറ്റവും നീണ്ട്‌ മദ്ധ്യാഹ്നം.

ഒടുവില്‍.....

ഏറ്റവുമൊടുവില്‍....

വോട്ടെടുപ്പ്‌ അവസാനിച്ചു.

എല്ലാം കെട്ടിപ്പെറുക്കി വടകര കൊണ്ടുക്കൊണ്ടുചെന്നു പണ്ടാരമടക്കി.

ലോഡ്ജ്‌ മുറിയില്‍ മടങ്ങിയെത്തിയപ്പോള്‍ പാതിരാ കഴിഞ്ഞിരുന്നു.

വല്ലാത്ത ദാഹം തോന്നി.

താഴെ ഒരു കലത്തില്‍ ലോഡ്ജുടമ ഗോപിയേട്ടന്‍ തിളപ്പിച്ചുവച്ചിരിക്കുന്ന കടുക്കാവെള്ളമുണ്ട്‌.

അതും കുടിച്ച്‌ തണുത്ത കിടക്കയില്‍ കമഴ്‌ന്നുകിടന്നപ്പോള്‍ ജീവിതം ധന്യമായതുപോലെ തോന്നി.

അന്നത്തെ കമന്റുകള്‍:
.

കുഞ്ഞന്‍ said...

ഹഹ...

കര്‍മ്മനിരതനായ ഓഫീസര്‍ടെ കര്‍മ്മം ചെയ്തൂ..അതില്‍ അഭിമാനിക്കുക..വലിയവനൊ ചെറിയവനൊയെന്നു നോക്കാതെ ചെയ്യണം..!

എന്റെ ഒരു കൂട്ടുകാരന്‍ ബസ്സില്‍ പോയപ്പോള്‍ ഒരു ചെറിയ മനുഷ്യന്‍ നല്ല തിര‍ക്കായിട്ടും അയാള്‍ ബസ്സിനകത്ത് മുന്നോട്ടു പോകാതെ നില്‍ക്കുന്നതു കണ്ടപ്പോള്‍, കൂട്ടുകാരന്‍ അയാളോട് കയര്‍ക്കുകയും,അതിനു മറുപടിയായി അയാള്‍ രൂക്ഷമായി ഒന്നു നോക്കുകയാണ് ചെയ്തത്. അപ്പോഴേക്കും കണ്ട്രാവിയും കിളിയും വന്ന് കൂട്ടുകാരനെ ബസ്സില്‍ നിന്നും ഇറക്കിവിട്ടു, ഇറക്കിവിടുമ്പോള്‍ പറഞ്ഞു അയാള്‍ തമ്മനം ഷാജിയാണെന്ന്( എറണാകുളം നഗരത്തിലെ പ്രമുഖ ഗുണ്ടയാണ് ഷാജി)

പിന്നെ അക്ഷരങ്ങള്‍ വായിക്കാന്‍ ബുദ്ധിമുട്ടുണ്ട്, ബോള്‍ഡാക്കിയത് മാറ്റുകയും പാര തിരിച്ച് എഴുതുകയാണെങ്കില്‍ വായന സുഖം കിട്ടിയേനെ..!

November 18, 2007 9:49 AM

Sul | സുല്‍ said...

വലിയ വരക്കാരാ
ബൂലോഗത്തേക്ക് സ്വാഗതം.

അനുഭവക്കുറിപ്പ് നന്നായിരിക്കുന്നു. പ്രാണന്‍ പോയ മദ്ധ്യാഹ്നം അല്ലേ :)

-സുല്‍

November 18, 2007 2:30 PM

വേണാടന്‍ said...

ഠിം....ഠൊ..ഠീം...
ഊരു പേടി ണ്ട് ല്ലേ

November 18, 2007 2:35 PM

അനൂപ്‌ തിരുവല്ല said...

നന്നായിട്ടുണ്ട്.

November 18, 2007 2:38 PM

വലിയ വരക്കാരന്‍ said...

കുഞ്ഞേട്ടാ, തമ്മനം ഷാജിയുടെ കാര്യം കേട്ടപ്പോളാണ്‌, തിരുവനന്തപുരത്തെ ഗുണ്ടുകാട്‌ ഷാജിയും ഞാനും ഒരേപോലിരിക്കുന്നെന്ന് പലരും പറയുന്നു.

സുല്‍ത്താനേ.....
സലാം....

അനൂപിന്‌.. താങ്ക്സ്‌

November 18, 2007 4:44 PM

വലിയ വരക്കാരന്‍ said...

വേണാടന്റെ വെടി കണ്ടൊന്നു പേടിച്ചു. പാനൂരാണെന്നു കരുതിയാണേ.. പിന്നല്ലേ അറിയുന്നത്‌ അതു കട്ടപ്പന നിന്നാണെന്ന്.
( അതോ അമേരിക്കയില്‍ നിന്നോ...? ... അയ്യോ!..)

November 18, 2007 5:00 PM

വാല്‍മീകി said...

ചെയ്തത് ഒരു വലിയ കാര്യമാണല്ലോ? മുഖം നോക്കാതെ നടപടിയെടുക്കാനല്ലേ നിങ്ങളോട് പറഞ്ഞിരിക്കുന്നത്? ആശംസകള്‍.

November 18, 2007 9:42 PM

ശ്രീവല്ലഭന്‍ said...

അത് നന്നായിരിക്കുന്നു. "എല്ലാവരും എന്നെ വളരെ ദയയോടെ നോക്കുന്നത്‌ ഒരു ഞെട്ടലോടെ ഞാന്‍ തിരിച്ചറിഞ്ഞു" എന്നെത് ഇഷ്ടപ്പെട്ടു. വീണ്ടും ഇതുപോലുള്ള അനുഭവങ്ങള്‍ എഴുതുക.... ഫോണ്ട് സൈസ് വലുതാക്കിയാല്‍ വായിയ്ക്കാന്‍ എളുപ്പമുണ്ട്.

November 19, 2007 12:48 AM

തറവാടി said...

വലിയ വരക്കാരാ ,

പാരഗ്രാഫുകള്‍ തിരിച്ചെഴുതിയാല്‍ വായിക്കാന്‍ സൗകര്യപ്പെടും , മേലുദ്യോഗസ്ഥനെക്കുറിച്ചുള്ള വിവരണം ക്ഷ : പിടിച്ചു :)

November 21, 2007 7:24 PM

തറവാടി said...

എന്താ വലിയ വരക്കാരാ ,
ഒരു കമന്‍‌റ്റ് അപ്പ്രൂവല്‍ ഒക്കെ? , നല്ലെതെന്നു പറഞ്ഞാലേ അപ്പ്രൂവ് ചെയ്യൂ എന്നുണ്ടൊ ?

November 21, 2007 7:25 PM

അലി said...

മുമ്പും ഇവിടെ വന്നിരുന്നു.
അന്നു കമന്റിയില്ല... ഞാനല്ല, ആരും...

നിറങ്ങള്‍ ചേര്‍ക്കാതെ നന്നായി എഴുതുക... വായിക്കാ‍ന്‍ ആളെത്തും..കമന്റും.

സ്പെഷ്യല്‍ ഓഫീസര്‍ നന്നായിരുന്നു. അഭിനന്ദനങ്ങള്‍...
നന്മകള്‍ നേരുന്നു.

November 22, 2007 11:09 PM

വലിയ വരക്കാരന്‍ said...

thank u ali
:)

November 26, 2007 12:26 PM

വലിയ വരക്കാരന്‍ said...

കമന്റ് അപ്പ്രൂവല്‍ എന്ന വിവരദോഷം ഒഴിവാക്കിയ വിവരം തറവാടിയെ സ്നേഹപൂര്‍വ്വം അറിയിക്കുന്നു

November 26, 2007 12:31 PM